Donetsk xalq respublikasi rahbari Malorossiya davlatining tuzilganini e’lon qildi

“Donetsk Xalq Respublikasi” rahbari Aleksandr Zaxarchenko yangi — Malorossiya davlati tashkil etilganini ma’lum qildi, deb xabar berdi Meduza.

Ushbu mamlakat Ukraina hududida (Qrimdan tashqari) tashkil etildi. Malorossiyaning poytaxti etib Donetsk shahri e’lon qilindi, Kiyev esa “poytaxt maqomisiz tarixiy-madaniy markaz” sifatida qoladi.

Zaxarchenkoning so‘zlariga ko‘ra, “mamlakatni qayta yaratish” Ukrainadagi urushni tugatish imkonini beradi. Shuningdek, uning fikricha “Ukraina nomi o‘zini o‘zi obro‘sizlantirgan”.

Bundan tashqari Zaxarchenko yangi mamlakatda uch yil favqulodda holat e’lon qilishni taklif etdi. Bu vaqt davomida siyosiy partiyalarning faoliyatini man etiladi va aynan shu davr ichida “Odessa, Maydan, Donbassdagi jinoyat”ning tergovi bo‘lib o‘tishi kerak.

Aleksandr Zaxarchenkoning jurnalistlarga ma’lum qilishicha, Malorossiya “sobiq Ukraina hududlarining raislari” tashabbusi bilan tashkil etilgan. Aynan qaysi mintaqalar rahbari ekanligi borasida aniqlik kiritmadi.

Malorossiyaning bayrog‘i sifatida Bogdan Xmelnitskiyning bayrog‘i tan olindi… Biz Donetsk xalq respublikasi Lugansk xalq respublikasi bilan birgalikda (Qrimni hisobga olmaganda) Ukraina hududidagi qonuniy hokimiyatni saqlanib qolgan yagona hudud deb hisoblaymiz.

Aleksandr Zaxarchenko