Ўзбекистон миллий университетида бошқа абитуриентларнинг ўрнига ҳужжат топширишга уринган икки ва ўзини «зиёли снайперлар» деб таништирган «сохта абитуриент»лар қўлга олинди. Бу ҳақда университет Қабул комиссияси ахборот хизмати «Дарё»га маълум қилди.
Хабар беришларича, бу йилдан ЎзМУда 2017/2018-ўқув йили учун абитуриентлар қабули жараёнида ҳужжат топширувчининг ҳужжатини қабул қилишда ва тест синовларини ўтказишда биометрик ва паспорт маълумотлари асосида абитуриентларни назорат қилиш (идентификация) ва бошқариш тизими, шунингдек, юзидан танувчи ва бармоқ изи сканери орқали шахсни аниқлашга қаратилган технология қўлланилмоқда.
Шунга қарамай, 2017 йил 11 июль куни ЎзМУнинг журналистика ва физика факультетларига Бобур Ҳасанов (1993 йил Бухоро вилоятида туғилган) ва Шаҳзодбек Ёқубов (1998 йил Сурхондарё вилоятида туғилган) бошқа абитуриентларнинг ўрнига ҳужжат топширишга уринган вақтида янги жорий этилган технология томонидан фош этилган ва уларнинг маълумотлари ҳуқуқ-тартибот органларига тақдим этилган.
ЎзМУ Қабул комиссияси ахборот хизмати хабарида алоҳида таъкидланишича, қўлга тушган ҳар иккала фуқаро: «Биз ‘зиёли снайперлар’миз, ҳеч қандай айб иш қилганимиз йўқ», — деб даъво қилган.
«Мирзо Улуғбек номидаги Ўзбекистон миллий университети Қабул комиссияси барча абитуриентлар ва уларнинг ота-оналарини шундай ‘зиёли снайперларънинг тузоғига илиниб қолмасликка чақиради. Шунингдек, юқоридаги янги ‘ақлли технология’ 1 август куни университетнинг барча факультетларида тўлиқ ишлашини маълум қилади», — дейилади университет ахборотида.
Изоҳ (0)