O‘zbekiston milliy universitetida boshqa abituriyentlarning o‘rniga hujjat topshirishga uringan ikki va o‘zini “ziyoli snayperlar” deb tanishtirgan “soxta abituriyent”lar qo‘lga olindi. Bu haqda universitet Qabul komissiyasi axborot xizmati “Daryo”ga ma’lum qildi.
Xabar berishlaricha, bu yildan O‘zMUda 2017/2018-o‘quv yili uchun abituriyentlar qabuli jarayonida hujjat topshiruvchining hujjatini qabul qilishda va test sinovlarini o‘tkazishda biometrik va pasport ma’lumotlari asosida abituriyentlarni nazorat qilish (identifikatsiya) va boshqarish tizimi, shuningdek, yuzidan tanuvchi va barmoq izi skaneri orqali shaxsni aniqlashga qaratilgan texnologiya qo‘llanilmoqda.
Shunga qaramay, 2017-yil 11-iyul kuni O‘zMUning jurnalistika va fizika fakultetlariga Bobur Hasanov (1993-yil Buxoro viloyatida tug‘ilgan) va Shahzodbek Yoqubov (1998-yil Surxondaryo viloyatida tug‘ilgan) boshqa abituriyentlarning o‘rniga hujjat topshirishga uringan vaqtida yangi joriy etilgan texnologiya tomonidan fosh etilgan va ularning ma’lumotlari huquq-tartibot organlariga taqdim etilgan.
O‘zMU Qabul komissiyasi axborot xizmati xabarida alohida ta’kidlanishicha, qo‘lga tushgan har ikkala fuqaro: “Biz ‘ziyoli snayperlar’miz, hech qanday ayb ish qilganimiz yo‘q”, — deb da’vo qilgan.
“Mirzo Ulug‘bek nomidagi O‘zbekiston milliy universiteti Qabul komissiyasi barcha abituriyentlar va ularning ota-onalarini shunday ‘ziyoli snayperlar’ning tuzog‘iga ilinib qolmaslikka chaqiradi. Shuningdek, yuqoridagi yangi ‘aqlli texnologiya’ 1-avgust kuni universitetning barcha fakultetlarida to‘liq ishlashini ma’lum qiladi”, — deyiladi universitet axborotida.
Izoh (0)