Тошкент давлат педагогика университетининг Бошланғич таълим ва жисмоний маданият факультети маънавий-маърифий ишлар бўйича декан муовини Гулчирой Абдураимова ўқишга киритиб қўйиш ваъдаси билан пора олаётган вақтда қўлга тушди.
Тошкент шаҳар Ички ишлар бош бошқармасидан маълум қилишларича, Гулчирой Абдураимова бир фуқаронинг ишончига кириб, унинг танишини «олийгоҳнинг мансабдор шахсларига пора бериш йўли билан» ўқишга киритиб қўйишни ваъда қилган.
Декан муовини 10 июль куни соат тахминан 16:00 да ўтказилган тезкор тадбир давомида 7 000 АҚШ доллари миқдоридаги пулни олаётган вақтда ашёвий далил билан қўлга олинган.
«Мазкур ҳолат юзасидан Чилонзор туман прокуратураси томонидан Жиноят кодексининг 168-моддаси 2-қисми ‘а’ банди (фирибгарлик, яъни, анча миқдорда, ўзганинг мулкини алдаш ва ишончни суиистеъмол қилиш йўли билан қўлга киритиш) ва 28, 211-моддаси 1-қисми (пора беришга далолатчилик қилиш) аломатлари билан жиноят иш қўзғатилган», — дейилади ИИББ ахборотида.
Ҳозирда дастлабки тергов ҳаракатлари давом эттирилиб, Гулчирой Абдураимованинг бошқа жиноятларга алоқадорлиги текширилмоқда.
Изоҳ (0)