Манила (Филиппин) ҳайвонот боғида дунёдаги энг қари — 65 ёшли Берта лақабли урғочи бегемот ўлди. Бу ҳақда «РИА Новости» хабар бермоқда.
Ҳайвонот боғи директори Хамес Дичавес 2,5 тоннали жонивор ўзининг майдончасида 7 июль, жума куни ўлик ҳолда топилганини маълум қилди. Тиббий текширувлар унинг ўлими организмдаги кўплаб органлар фаолияти тўхтагани туфайли рўй берганини кўрсатди.
Берта ҳайвонот боғи очилган вақтдан — 1959 йилдан бери бу ерда яшаб келарди. Унинг жуфти ўтган асрнинг 80 йилларидаёқ ўлиб кетган, жуфтлик насл қолдиришга улгурмаганди.
Маълумот учун, бегемотларнинг тутқунликдаги ўртача ҳаёт давомийлиги 40—50 йилни ташкил этади.