Manila (Filippin) hayvonot bog‘ida dunyodagi eng qari — 65 yoshli Berta laqabli urg‘ochi begemot o‘ldi. Bu haqda “RIA Novosti” xabar bermoqda.
Hayvonot bog‘i direktori Xames Dichaves 2,5 tonnali jonivor o‘zining maydonchasida 7-iyul, juma kuni o‘lik holda topilganini ma’lum qildi. Tibbiy tekshiruvlar uning o‘limi organizmdagi ko‘plab organlar faoliyati to‘xtagani tufayli ro‘y berganini ko‘rsatdi.
Berta hayvonot bog‘i ochilgan vaqtdan — 1959-yildan beri bu yerda yashab kelardi. Uning jufti o‘tgan asrning 80-yillaridayoq o‘lib ketgan, juftlik nasl qoldirishga ulgurmagandi.
Ma’lumot uchun, begemotlarning tutqunlikdagi o‘rtacha hayot davomiyligi 40—50 yilni tashkil etadi.
Izoh (0)