GM Uzbekistan июнь ойида ички бозорда 10519 та автомобиль сотди. Май ойида 8900 та машина сотилган эди. Бу ҳақда 5 июлда Асака автомобиль заводида ОАВ вакиллари учун уюштирилган матбуот сафари давомида компания бош директори вазифасини бажарувчи Рустам Ражабов маълум қилди.
Компания автомобиллари 2017 йил 1 июндан янги нархларда сотувга чиқарила бошланди. Унга кўра, автомобиллар нархи долларнинг давлат курсига «боғланган». Ҳар сафар долларнинг давлат курси ошиши билан автомобилларнинг нархи ҳам кўтарилиб келмоқда. Бироқ автомобиллар нархининг ошиши июнь ойидаги савдо кўрсаткичларига салбий таъсир қилмади.
Компания бош директори томонидан маълум қилинишича, экспорт ҳажми ҳам ошмоқда. Апрель ойида 1600 та, май ойида 2300 та автомобиль экспорт қилинган бўлса, июнда 2500 та машина экспорт қилинди.
Аввалроқ, GM Uzbekistan нима учун ўз автомобиллари нархини долларга боғлаб қўйганига изоҳ берган ва шу каби бошқа саволларни батафсилроқ ёритиш мақсадида компания томонидан ОАВ вакиллари учун автомобилсозлик тармоғи корхоналарига матбуот сафари уюштирилиши режалаштирилаётганини маълум қилган эди.
Изоҳ (0)