Олий тиббий таълим соҳасида амалга оширилаётган ўзгаришлар тиббиёт кадрлари етишмовчилиги қопланишини 15 фоизга тезлаштиради. Бу ҳақда, Ўзбекистон соғлиқни сақлаш вазири Алишер Шодмоновга асосланиб, вазирлик матбуот хизмати хабар бермоқда.
Ўзбекистон соғлиқни сақлаш вазири Алишер Шодмоновнинг маълум қилишича, соҳанинг бирламчи тизимида кадрлар таъминотида номутаносибликлар бор. «Масалан, Ўзбекистон бўйича шифокорларнинг умумий сони 72 минг нафар бўлиб, ҳар 10 минг аҳолига нисбатан 23,5 нафарни ташкил этади. Аммо айрим вилоятларда бу кўрсаткич талаб даражасида эмас», — дейди вазир.
Ҳозирги вақтда Ўзбекистонда 7 та олий тиббий таълим муассасалари ҳамда уларнинг ҳудудий филиалларида ҳар йили 2 мингдан ортиқ шифокорлар тайёрланмоқда. Вазирнинг тан олишича, мазкур ОТМларда бакалавриат босқичининг (даволаш иши) 7 йил давом этиши замон талабларига жавоб бермасди, бундан ташқари, «таълим учун асосланмаган ҳолда ортиқча молиявий маблағларни талаб этаётган эди».
Президент Шавкат Мирзиёевнинг «Ўзбекистон Республикасида тиббий таълим тизимини янада ислоҳ қилиш чора-тадбирлари тўғрисида»ги қарорига мувофиқ, 2017/2018 ўқув йилидан бошлаб даволаш иши, касбий таълим (даволаш иши), ҳарбий-тиббиёт иши (даволаш иши), педиатрия иши 6 йил, тиббий-биологик иш 4 йил, тиббий профилактика иши 5 йил этиб белгиланди.
«Эътиборли томони, ҳозирги вақтда даволаш иши, касбий таълим (даволаш иши), ҳарбий тиббиёт иши (даволаш иши), педиатрия иши бакалавриат йўналишлари бўйича таълим олаётган 2—5-босқич талабалари ҳам таълимни 6 йиллик ўқув дастури асосида давом эттириши кўзда тутилган», — дейди ССВ раҳбари Алишер Шодмонов.
Айни вақтда, Алишер Шодмоновнинг таъкидлашича, ўрганишлар соҳада ўқув дастурларини янада такомиллаштириш вақти келганини кўрсатмоқда. «Ўқув соатларини таҳлил қилиб ўрганганимизда, ўқув дастурларидаги мавзуларнинг 15 фоизи ва ҳатто ундан ҳам ортиғи такрорланиши аниқланди. Бундан ташқари, бакалавриат ва магистратура босқичидаги ўқув режа ва дастурларда мутахассисликка оид бўлмаган фанларнинг кўплиги ҳам талабаларнинг ортиқча вақтини олиб, ихтисослик бўйича билим олишига сезиларли таъсир қилиб келмоқда», — дейди вазир.
Шу муносабат билан, ҳозирги вақтда бакалавриат босқичи учун давлат таълим стандартлари қайта ишлаб чиқилмоқда. Хусусан, Президент қарори билан олий тиббий таълимнинг клиникагача бўлган ва клиник фанлар блоклари бўйича ўқув соатлари салмоғи оширилиши, олий тиббий таълим стандартларини қайта кўриб чиқиш белгиланган.
Касбий фанлар блоки кенгайтирилиб, ижтимоий-иқтисодий фанлар блокини 7 фоизгача қисқартириш, клиникагача ва клиникага оид фанлар учун соатлар ҳажмини 85 фоизгача кўпайтириш назарда тутилган. «Аввалги Давлат таълим стандартларида белгиланган ўқув режаларида гуманитар ва ижтимоий-иқтисодий фанлар блоки бўйича ўқув соатлари ҳажми 15—20 фоизгача эди. Асосий мутахассислик бўйича эса 40-50 фоизни ташкил қилган, холос», — дейди вазир.
Соғлиқни сақлаш вазирининг таъкидлашича, тиббий таълим соҳасида Президент қарорлари асосида юз берадиган ўзгаришлар натижасида тиббиёт кадрлари етишмовчилиги қопланиши 15 фоизга тезлаштирилади, бюджет маблағларининг мақсадли сарфланишига эришилади, шунингдек, тиббий таълим халқаро стандарт талабларига мослаштирилади.
Изоҳ (0)