Ўзбекистонда биринчи марта АҚШ университети бўлинмаси очилади

Тошкент ахборот технологиялари университети (ТАТУ)да АҚШнинг Webster (Вебстер) университетининг халқаро таълим дастури асосида янги факультет ташкил этилиши мумкин. Бу ҳақда UzNews хабар бермоқда.

Хабар беришларича, Ўзбекистонга амалий ташриф билан келган университетнинг таълим ишлари, халқаро кампус ва ташаббуслар бўйича вице-президенти Питер Маҳер ТАТУда музокаралар ўтказди.

Бошланғич музокаралар натижасида «Ахборот технологиялари (Информатика, Кибер хавфсизлик)», «Медиа коммуникация (Телевизион технологиялари)» йўналишлари бўйича бакалавриатура дастурини ўқув жараёнига татбиқ этиш юзасидан келишиб олинди.

«Бундан ташқари, меморандум бандларини бажариш мақсадида, Webster университетининг халқаро таълим дастури асосида ТАТУда факультет ташкил этиш бўйича музокаралар олиб борилди», — дейилади хабарда.

Webster университетига 1915 йилда асос солинган бўлиб, у АҚШнинг Миссури штати, Сент-Луис шаҳрида жойлашган. У хусусий нотижорат олий таълим муассасаси бўлиб, унда 17 минг талаба бир қатор йўналишларда, жумладан, ахборот технологиялари ва коммуникация соҳасида таълим олади.

Университет Европа, Осиё ҳамда Африка минтақаларида ўз кампусларига эга.