22 май куни Манчестер шаҳридаги Manchester Arena’да портлашни уюштирган террорчи Салмон Обидий бомбани YouTube’даги «видеодарслар» ёрдамида тайёрлаган бўлиши мумкин. Бу ҳақда «Газета.ru» хабар бермоқда.
The Times газетаси маълумотларига кўра, Обидий YouTube’да портловчи ускуналарни тайёрлаш бўйича роликларни томоша қилган. Бундан ташқари, у интернетдан кимёвий бирикмалар ҳақидаги маълумотларни кўчириб олган бўлиб, кейинчалик Manchester Arena’даги портлаш жойида ҳам худди шундай бирикмаларнинг излари топилган.
Газетанинг алоҳида қайд этишича, дастлаб махсус хизматлар бомба соҳадан хабардор тажрибали шахс томонидан тайёрланган, деб тахмин қилган эди.
Manchester Arena’да 22 май куни юз берган теракт оқибатида 22 киши ҳалок бўлган эди.
Изоҳ (0)