Ўзбекистон миллий терма жамоасининг собиқ аъзоси, фаолиятини Тошкентнинг «Локомотив» футбол клубида давом эттираётган Тимур Кападзе «Championat.asia» нашрига интервью берди ва бир қатор оғриқли масалалар борасида сўз юритди.
Кападзенинг айтишича, мамлакат миллий терма жамоасида Игорь Сергеев, Александр Лобанов, Станислав Андреев, Даврон Ҳошимов каби футболчиларнинг бўлиши ҳаддан ошишдир. Миллий терма жамоа футболчиларига тўпни ушлаб турмай, олдинга тепиб юборавериш буюрилавергач, улар тўп оёққа тушганда нима қилишни билмай қолади ва унинг кетидан югуриб, кўп куч йўқотади, чарчаган ҳолига эса яхши ўйнай олмайди.
Ярим ҳимоячи Ўзбекистонда шароитлари энг яхши клуб сифатида ўзи бир вақтлар тўп сурган «Бунёдкор»ни кўрсатиб ўтган. Юқорида айтилганидек, у ҳозир «Локомотив»да ўйнайди, ўз вақтида «Пахтакор» ва «Нефтчи» клублари шарафини ҳимоя қилган. «Бухоро» билан ўйинга ташриф буюрган Кападзе жамоада шароит яхши эмаслиги, ҳатто ечиниш хонасида ҳаво алмаштириш тизими ишламаслиги ҳақида айтган.
Футболчи, шунингдек, ўзининг ҳамкасбларини кескин танқид қилиб чиққан Олимпиада чемпиони Руслан Нуриддинов борасида фикр билдирган. Кападзенинг айтишича, у 10 марта Ўзбекистон чемпиони бўлган, лекин 10 та машина олмаган. Олимпиада чемпиони эса ўзини қандай тутишни билиши керак.
«Олдинда иккита ўйин бор. Шу аҳволимизда ким мени Жаҳон чемпионатига чиқамиз деб ишонтира олади? Чиқа олмайди бу аҳволида», — дейди Тимур Кападзе.
Изоҳ (0)