Британиялик археологлар Эфиопия шарқида милодгача Х асрда бунёд этилган Харла шаҳрини топди. Улкан инсонлар шаҳри ҳисобланган Харлада XII асрга мансуб масжид ҳам аниқланди. Бу ҳақда «Корреспондент.net» хабар бермоқда.
Эксетер университети профессори Тимоти Инсоллга кўра, минтақавий ҳунармандлик ва савдо маркази бўлган шаҳар аҳли бижутерия ва заргарлик буюмлари тайёрлашга ихтисослашганди.
Харла Қизил денгизи, Ҳинд океани ва ҳатто Араб кўрфази минтақаси давлатлари билан савдо-сотиқ олиб борган. Қазишма ишлари давомида топилган буюмлар Мадагаскар, Малдив ороллари, Яман ва Хитойдан олиб келинганди.
Олдинлари шаҳар харобалари топилган жой ҳақида йирик тошлардан тикланган бинолар туфайли бу ерда баҳайбат одамлар истиқомат қилгани тўғрисида афсоналар тўқилганди.
«Биз буни, албатта, рад этдик, бироқ бизга ишонишмади, деб ўйлайман», — дейди профессор Инсолл.
Изоҳ (0)