Олимларнинг сўзларига кўра, сув омборлари қурилиши сув етишмаслиги муаммосини умуман ҳал қила олмайди. Аксинча, дарё оқимининг қуйи қисмида яшовчи аҳоли учун қайтадан тақчилликни келтириб чиқаради. Бу ҳақда «Наука ТВ» хабар берди.
Амстердам эркин университети олими Тед Велдкампнинг маълум қилишича, Ер аҳолисининг қарийб чорак қисми дарёлардаги қурилишлар сабабли сув тақчиллигидан қийналади. Биринчи ўринда бу ерларни суғориш ва гидроэнергия олиш учун сувни йиғиб турадиган сув омборлари туфайли юз беради.
Сув омборларининг аҳолига таъсирини ўрганиш учун Велдкамп ва унинг ҳамкасблари батафсил тадқиқот ўтказди. Тадқиқот доирасида олимлар Ер шарини майдони 50 километр бўлган квадратларга бўлди. Кейин олимлар сув омборлари қурилишида ғолиб ва мағлубларни аниқлаш учун 1971—2010 йиллар орасидаги даврда танқисликни таҳлил қилди.
Натижада олимлар дарё оқимининг юқори қисмида яшовчи аҳоли қуйи қисмида яшовчи аҳолидан кўра кўпроқ устунликка эга бўлгани аниқланди. Велдкампнинг сўзларига кўра, шу тариқа, дунёда сув омборлари қуриш учун икки триллион доллар сарфланган, бироқ натижада аҳолининг 23 фоизи сувга муҳтожликни сеза бошлади, атиги 20 фоизи эса сувдан бемалол фойдалана олди.
Бу каби «муаммоли» дарёлар қаторига олимлар Хитой шимолидаги Хуанхе, Ганганинг Бангладешдаги жанубий қисми, Эронда қурғоқчиликларни келтириб чиқараётган Туркиядаги Фрот, шунингдек, Колорадо дарёсини киритган.
Изоҳ (0)