П.Ф.Боровский номидаги Тошкент тиббиёт коллежининг фаолиятини ўрганиш натижасида ушбу муассасада ўқув тарбиявий жараённи ташкил этишда жиддий муаммолар борлиги аниқланди. Жумладан, коллежда 2 минг реал ўқувчи ўрни мавжуд бўлса-да, бугунги кунда 3 минг 94 нафар ўқувчи таҳсил олмоқда. Бу ҳақда Ўзбекистон Соғлиқни сақлаш вазирлигининг Ахборот хизмати хабар берди.
«Коллежда ўқувчилар сони унинг қувватига нисбатан 1.5 баробар кўплиги, гуруҳларда ўқувчилар сони ўртача 36—38 нафарни ташкил этиши, ўқув хоналари етишмаслиги дарслар 2 сменада ташкил этилишига сабаб бўлган. Бу эса ўқувчиларнинг дарсдан бўш вақтларида тўгарак машғулотларига жалб этилишини чеклаб қўйган, яъни қўшимча машғулотларни ўтказиш учун бўш аудиторияларга жуда катта эҳтиёж сезилган», — дейилади вазирлик ахборотида.
Таъкидланишича, ўқувчилар сонининг кўплиги жисмоний тарбия дарсларини спорт залларида ташкил этишда ўқувчиларни тўлиқ қамраб олиш имконини бермайди. Айрим гуруҳларга жисмоний тарбия дарсларини ўтиш имкони бўлмаган.
Бундан ташқари, коллежнинг фаоллар зали ҳам мавжуд эмас. Бу ҳолат ўқувчилар ўртасида маънавий-ахлоқий, тарбиявий ишларни ташкил этиш, ота-оналар йиғилишларини ўтказиш имконини бермайди. Шунингдек, уч минг нафардан ортиқ ўқувчи таҳсил оладиган коллежнинг Ахборот ресурс маркази ўқув зали атиги 34 ўқувчига мўлжалланган.
Дарсларнинг 2 сменада ташкил этилганлиги, ўқув хоналарининг барчаси бандлиги, таълим муассасасида ўқитувчиларнинг ўз устида ишлаши, ота-оналар билан ишлаш, дарсдан ташқари ишларни ташкил этиш, психологик хизмат кўрсатиш, маънавий-маърифий, тарбиявий ишларни ташкил этишда жиддий муаммоларни юзага келтирган.
Юқоридагиларни инобатга олиб, Тошкент шаҳридаги П.Ф.Боровский номли тиббиёт коллежига 2017—2018-ўқув йили учун қабул тўхтатилиши юзасидан тегишли таклифлар тайёрланди. Мазкур таклифлар Ўзбекистон Республикаси таълим муассасаларига қабул қилиш бўйича Давлат комиссияси ҳамда Тошкент шаҳар ҳокимлиги ҳузуридаги 9-синф битирувчиларини академик лицей ва касб-ҳунар коллежларига қамраб олиш бўйича Мувофиқлаштирувчи Кенгашга тақдим этилди.Мазкур ваколатли органлар томонидан таълим муассасасининг келгуси фаолияти билан боғлиқ тегишли қарорлар қабул қилинади.
Ўзбекистон Республикаси Соғлиқни сақлаш вазирлиги ахборот хизмати
Изоҳ (0)