Olimlarning so‘zlariga ko‘ra, suv omborlari qurilishi suv yetishmasligi muammosini umuman hal qila olmaydi. Aksincha, daryo oqimining quyi qismida yashovchi aholi uchun qaytadan taqchillikni keltirib chiqaradi. Bu haqda “Nauka TV” xabar berdi.
Amsterdam erkin universiteti olimi Ted Veldkampning ma’lum qilishicha, Yer aholisining qariyb chorak qismi daryolardagi qurilishlar sababli suv taqchilligidan qiynaladi. Birinchi o‘rinda bu yerlarni sug‘orish va gidroenergiya olish uchun suvni yig‘ib turadigan suv omborlari tufayli yuz beradi.
Suv omborlarining aholiga ta’sirini o‘rganish uchun Veldkamp va uning hamkasblari batafsil tadqiqot o‘tkazdi. Tadqiqot doirasida olimlar Yer sharini maydoni 50 kilometr bo‘lgan kvadratlarga bo‘ldi. Keyin olimlar suv omborlari qurilishida g‘olib va mag‘lublarni aniqlash uchun 1971—2010-yillar orasidagi davrda tanqislikni tahlil qildi.
Natijada olimlar daryo oqimining yuqori qismida yashovchi aholi quyi qismida yashovchi aholidan ko‘ra ko‘proq ustunlikka ega bo‘lgani aniqlandi. Veldkampning so‘zlariga ko‘ra, shu tariqa, dunyoda suv omborlari qurish uchun ikki trillion dollar sarflangan, biroq natijada aholining 23 foizi suvga muhtojlikni seza boshladi, atigi 20 foizi esa suvdan bemalol foydalana oldi.
Bu kabi “muammoli” daryolar qatoriga olimlar Xitoy shimolidagi Xuanxe, Ganganing Bangladeshdagi janubiy qismi, Eronda qurg‘oqchiliklarni keltirib chiqarayotgan Turkiyadagi Frot, shuningdek, Kolorado daryosini kiritgan.
Izoh (0)