Сервер Жепаров: ЖЧ—2014 армон бўлгач, термадан кетишни ва футбол кўрмасликни истагандим

Ўзбекистон миллий терма жамоаси вице-сардори Сервер Жепаров Эронга қарши учрашув олдидан ОФК расмий сайтига интервью берди, деб ёзди ЎФФ матбуот хизмати.

Суҳбат давомида Жепаров мундиалга бориш истаги ҳақида гапирди. Бу саралаш унинг учун катта эҳтимол билан сўнггиси бўлади.

Барчаси жуда оддий — биз саралаш босқичидаги қолган уч ўйинда ғалаба қозонишимиз керак. Шунда плей-оффда ўйнамаймиз ва Жаҳон чемпионатига автоматик равишда йўл оламиз.

Исталган жамоа билан ўйнай олишимиз бизга ишонч беради. Ҳатто сафар ўйинларида ҳам. Биз гуруҳдаги энг кучли рақибни мағлубиятга учратиш мумкинлигига ишонамиз ва айнан шу нарса бизга куч беради. Рақибни мағлуб этиш учун 100, ҳатто 120 фоиз кучимизни беришимиз керак бўлади. Барча футболчидан бир жамоа бўлиб ўйнаш талаб қилинади.

Сервер Жепаров, Ўзбекистон термаси аъзоси

Ўзбекистон миллий терма жамоаси бош мураббийи Самвел Бабаян қўл остидаги таркиб тарихдаги энг кучлиси экани ҳақида бир неча бор таъкидлаганига қарамай, Сервер Жепаров энг кучли жамоа сифатида 2014 йилги Жаҳон чемпионати учун ҳаракат қилган таркибни кўрсатди.

Сўнгги 8 йил давомида, айниқса, бундан аввалги саралаш босқичида кучли таркиб билан ҳаракат қилдик. Бу мен ўйнаган энг кучли авлод эди.

Биз яхши ўйнагандик. ЖЧ—2014 га чиқиш учун эса битта гол камлик қилди. Бундан афсусда эдик. Жанубий Корея термаси Эрондан мағлуб бўлганини эшитгач, қўлдан бой берилган барча имкониятлардан афсусга тушгандик. Мен термадан кетишни ва умуман футбол кўрмасликни истагандим.

Сервер Жепаров, Ўзбекистон термаси аъзоси

Эрон ЖЧ—2018 саралаш босқичида 7 та ўйин ўтказиб, 5 та ғалаба ва 2 та дуранг қайд этди. Карлуш Кейруш шогирдлари бирорта ҳам ўйинда гол ўтказиб юбормади. Шунга қарамай, Сервер Жепаров бугунги ўйин олдидан ижойиб кайфиятда эканини айтди. Чунки Ўзбекистон 2012 йил Теҳронда Эронни мағлубиятга учратишга муваффақ бўлган.

Ғалаба нафақат мен учун, балки, Ўзбекистон аҳолиси учун ҳам мотивация бўларди. Чунки мамлакат термаси мундиалда иштирок этмаган. 34 ёшимда ЖЧ—2018 турнирига йўл олиб, мамлакат қаҳрамонига айланишни хоҳлардим.

Сервер Жепаров, Ўзбекистон термаси аъзоси