Server Jeparov: JCh—2014 armon bo‘lgach, termadan ketishni va futbol ko‘rmaslikni istagandim

O‘zbekiston milliy terma jamoasi vitse-sardori Server Jeparov Eronga qarshi uchrashuv oldidan OFK rasmiy saytiga intervyu berdi, deb yozdi O‘FF matbuot xizmati.

Suhbat davomida Jeparov mundialga borish istagi haqida gapirdi. Bu saralash uning uchun katta ehtimol bilan so‘nggisi bo‘ladi.

Barchasi juda oddiy — biz saralash bosqichidagi qolgan uch o‘yinda g‘alaba qozonishimiz kerak. Shunda pley-offda o‘ynamaymiz va Jahon chempionatiga avtomatik ravishda yo‘l olamiz.

Istalgan jamoa bilan o‘ynay olishimiz bizga ishonch beradi. Hatto safar o‘yinlarida ham. Biz guruhdagi eng kuchli raqibni mag‘lubiyatga uchratish mumkinligiga ishonamiz va aynan shu narsa bizga kuch beradi. Raqibni mag‘lub etish uchun 100, hatto 120 foiz kuchimizni berishimiz kerak bo‘ladi. Barcha futbolchidan bir jamoa bo‘lib o‘ynash talab qilinadi.

Server Jeparov, O‘zbekiston termasi a’zosi

O‘zbekiston milliy terma jamoasi bosh murabbiyi Samvel Babayan qo‘l ostidagi tarkib tarixdagi eng kuchlisi ekani haqida bir necha bor ta’kidlaganiga qaramay, Server Jeparov eng kuchli jamoa sifatida 2014-yilgi Jahon chempionati uchun harakat qilgan tarkibni ko‘rsatdi.

So‘nggi 8 yil davomida, ayniqsa, bundan avvalgi saralash bosqichida kuchli tarkib bilan harakat qildik. Bu men o‘ynagan eng kuchli avlod edi.

Biz yaxshi o‘ynagandik. JCh—2014 ga chiqish uchun esa bitta gol kamlik qildi. Bundan afsusda edik. Janubiy Koreya termasi Erondan mag‘lub bo‘lganini eshitgach, qo‘ldan boy berilgan barcha imkoniyatlardan afsusga tushgandik. Men termadan ketishni va umuman futbol ko‘rmaslikni istagandim.

Server Jeparov, O‘zbekiston termasi a’zosi

Eron JCh—2018 saralash bosqichida 7 ta o‘yin o‘tkazib, 5 ta g‘alaba va 2 ta durang qayd etdi. Karlush Keyrush shogirdlari birorta ham o‘yinda gol o‘tkazib yubormadi. Shunga qaramay, Server Jeparov bugungi o‘yin oldidan ijoyib kayfiyatda ekanini aytdi. Chunki O‘zbekiston 2012-yil Tehronda Eronni mag‘lubiyatga uchratishga muvaffaq bo‘lgan.

G‘alaba nafaqat men uchun, balki, O‘zbekiston aholisi uchun ham motivatsiya bo‘lardi. Chunki mamlakat termasi mundialda ishtirok etmagan. 34 yoshimda JCh—2018 turniriga yo‘l olib, mamlakat qahramoniga aylanishni xohlardim.

Server Jeparov, O‘zbekiston termasi a’zosi