Қозоғистон пойтахти Остонада давом этаётган ЭКСПО—2017 доирасида Ўзбекистон павильонида энергиянинг муқобил манбалари орқали ҳаракатланадиган транспорт воситалари намойиш этилмоқда. Бу ҳақда ЎзА хабар бермоқда.
ЎзА мухбири Ўзбекистон павильонида меҳмон бўлган ташрифчилардан қисқа интервьюлар олган. Улардан бири — канадалик Дуглас Клан ЭКСПОнинг Ўзбекистонга ажратилган ҳудудида «нафақат келажак энергияси қандай бўлиши ҳақида маълумотга эга бўлгани, балки оддий сув ёрдамида ҳаракатланадиган ихчам автомобиль ва қуёш нуридан қувватланадиган Ravon’ни ўз кўзлари билан кўргани»ни маълум қилган.
Канадалик ташрифчи тилга олган транспорт воситалари Ўзбекистонда қачондан ва қайси корхона томонидан ишлаб чиқарилиши ҳақида ҳозирча батафсил ахборот йўқ.
Аввалроқ ЎзА Ўзбекистон павильонидан ўрин олган қуёш энергияси стендида 2030 йилда автомобилларни қуёш нури ёрдамида қандай қувватлантириш мумкин экани намойиш этилаётгани ҳақида хабар берган эди.
Маълумот учун, Ўзбекистон павильонининг биринчи қавати 630 квадрат метр майдонни эгаллаган бўлиб, бу ерда қуёш, шамол ва сув, яъни келажак энергияси маҳсулотлари намойиш этилмоқда.
Умумий майдони 550 квадрат метрни ташкил этган иккинчи қаватда Ўзбекистоннинг транспорт ва логистика, туризм соҳалари ҳамда озиқ-овқат, вино ва шарбат тайёрлаш саноатида эришилган ютуқлар, миллий таомлар намойиш этилмоқда.
Изоҳ (0)