Пойтахтдаги эски ҳайвонот боғи ўрнида 10 июнь, шанба куни Бобур номидаги Тошкент марказий эко боғи очилди. Бу ҳақда «Газета.uz» хабар бермоқда.
Боғ ҳудуди 12 гектардан иборат. Унда югуриш ва велосипед йўлакчалари, мини футбол, оқ қум тўшалган пляж волейболи ва бадминтон майдончалари, воркаут учун тренажёрлар, йога билан шуғулланиш учун пешайвон ҳамда икки теннис корти мавжуд.
Спорт майдончалари қаршисида кийим алмаштириш ва душ қабул қилиш хоналари жойлашган. Болалар учун ҳам ўйин майдончалари бор, бироқ аттракционлар ўрнатилмаган.
Боғ ҳудудига кириладиган ҳар икки дарвоза (турар-жой мавзеси ва Махтумқули кўчаси) томонда автотураргоҳлар барпо этилган. Қурилиш ишларида экологик материаллар ва габион — тош билан тўлдирилган тўрлардан фойдаланилган.
Боғдаги эски фаввора реконструкция қилинди. Яшил ҳудуд марказида атрофи кўл билан ўралган орол бўлиб, у ерда байрам тадбирлари ўтказиш, эсдалик учун суратга тушиш мумкин.
Экобоғ маъмуриятига кўра, 10 июнь куни ташриф буюрувчилар учун аниматорлар, кўзбойлоғичлар ва масхарабозлар иштирокида кўнгилочар дастурлар, кечки 17:00 да эса лайв-бендлар ва ўзбек эстрадаси юлдузлари иштирокида концерт ташкил этилади.
Изоҳ (0)