Буюк Британияда кучга кирган янги “Онлайн хавфсизлик тўғрисидаги” қонун туфайли ижтимоий тармоқлар, жумладан, Х ва Reddit Украина ва Ғазодаги урушга оид кўплаб контентларни чеклай бошлади. Бу ҳақда BBC хабар берди.
Маълум қилинишича, 25 июль куни кучга кирган қонун 18 ёшгача бўлган фойдаланувчиларни зарарли контентлар: порнография, ўз-ўзига зарар етказиш, очарчилик, уруш ва зўравонликни тарғиб қилувчи ҳар қандай постларни чеклашни кўзда тутади. Унга риоя қилмаган платформалар катта жарималарга тортилади. Хусусан, улар 18 миллион фунт стерлинггача ёки глобал даромадининг 10 фоизи миқдорида жарима тўлайди.
Билдирилишича, ушбу қонун туфайли жамоат манфаатига оид контентлар ҳам чекланмоқда. Масалан, Ғазода ўз оиласининг жасадларини излаётган эркак тасвирланган видео ёки Украинадаги Shahed дронининг уриб туширилган лавҳаси ва ҳаттоки, парламентда айтилган баъзи нутқлар ҳам блокланган.
Мутахассислар бу ҳолат сўз эркинлигига хавф туғдиришини таъкидламоқда. Технологиялар бўйича экспертлар, айниқса, компанияларнинг контентни ҳаддан ортиқ блоклаши жиддий муаммоларга олиб келиши мумкинлигини айтмоқда. Британия ҳукумати эса платформалар қонунни бузмасдан, сиёсий баҳсларни цензура қилмаслигини таъкидлаган.
Маълумотларга кўра, Х ва Reddit фойдаланувчиларининг катта қисми ижтиомоий тармоқдан аккаунтсиз фойдаланади, бу эса уларни автоматик равишда вояга етмаган сифатида кўрсатади ва кўплаб контентларга киришни чеклайди.
Х тармоғининг эгаси Илон Маск онлайн хавфсизлик тўғрисидаги қонунни қаттиқ танқид қилмоқда. Жумладан, у Х да шундай пост қолдирди:
“Бу қонуннинг мақсади - халқни тинчлантириш ва бостириш.”
Изоҳ (0)