Ўзбекистон Президенти деярли ҳар куни Ҳукумат даҳаси (Олий Мажлис Сенати, Президент девони, Вазирлар Маҳкамаси бинолари жойлашган ҳудуд) томон ўтиб-қайтадиган Мустақиллик шоҳ кўчасининг ўртасидаги ажратувчи тўсиқлар 27 май, якшанба куни олиб ташланди. Кўчанинг бошидан охиригача.
Ҳаёт учун хавфли тўсиқлар
Мустақиллик шоҳ кўчасидаги ажратувчи тўсиқлар 2015 йилнинг ёз—куз ойларида ўрнатиб чиқилган. Демонтаж вақтида «Газета.uz» мухбири воқеа жойида хизмат ўтаётган йўл нозири билан суҳбатлашганида, у тўсиқларнинг олиб ташланиши йўл ҳаракати хавфсизлигини оширишга йўналтирилганини айтиб ўтди. Икки йил аввал бу тўсиқлар нима сабабдан ўрнатилаётгани аниқ ва очиқ айтилмаган, лекин баъзилар ўшанда ҳам бу қарор «йўл ҳаракати хавфсизлигини оширишга хизмат қилиши»ни таъкидлаган эди.Тошкентнинг қарийб барча шоҳ кўчаларига кириб борган мазкур ажратувчи тўсиқлар амалда йўл ҳаракати хавфсизлигини оширишга эмас, балки пиёдалар ҳаётининг хавф остида қолиши ва ҳайдовчиларнинг тўсиқ бўйлаб хавотир билан ҳаракатланишига сабаб бўлди, холос. Катта тезликда кетаётган ҳайдовчи ўтирган жойидан тўсиқ ортидан чиқиб келаётган пиёдани, чорраҳаларда эса йўл белгилари ва қарама-қарши томондан келаётган автомобилни кўрмай қолиши эҳтимолини оширди.
Бу тўсиқларнинг хавфли экани ҳақида 2016 йили ҳатто Ички ишлар вазирлигининг газетаси («Постда»)да ҳам ёзилди, бироқ ундан кейин очилган янги ва тўлиқ таъмирланган қатор кўчаларда мазкур ажратувчи тўсиқларнинг ўрнатилиши давом этди. Таъкидлаш жоиз, Тошкентда етишмаган ирода вилоятларда топилди: Нукус, Бухоро каби шаҳарларда пиёдалар ўтиш жойларида ажратувчи тўсиқларнинг «бўйи пасайтирилди». Лекин пиёдаларнинг хавфсизлигини таъминлаш учун шунинг ўзи етарли эди, деб айтиш қийин.
Ҳаммасига Ян Гейл сабабчими?
16 май куни Тошкентга жаҳонга машҳур даниялик машҳур архитектор Ян Гейл ташриф буюрди. Бунгача таклифлари Нью-Йорк, Лондон, Москва ва Олмаотада сезиларли ўзгаришларга сабаб бўлган мутахассис Ўзбекистонда атиги бир неча кун бўлди ва «Газета.uz» нашрига берган интервьюсида тавсия ўлароқ: «Шаҳарларни... йўллар ўртасидаги ажратувчи тўсиқларни олиб ташлаб... одамлар учун қулайлаштириш мумкин», — эканлигини таъкидлаган эди.
Гейлнинг ташрифидан бир ҳафта ўтар-ўтмас Мустақиллик шоҳ кўчасида ажратувчи тўсиқлар олиб ташланди. Бу айнан даниялик меъмор берган тавсияларни ҳаётга татбиқ этишнинг бошланишими ёки шунчаки тасодиф? Бир нарса дейиш қийин, сабаби орадан икки кун ўтган бўлса ҳамки, вазият юзасидан на шаҳар ҳокимлиги ва на бошқа мутассадди ташкилотлар изоҳ берди.
Ваҳоланки, бир қатор саволлар очиқ қолмоқда: ажратувчи тўсиқлар кўчаларга нега ўрнатилганди-ю, энди нима сабабдан олиб ташланмоқда? Бошқа кўчалардаги шундай тўсиқлар ҳам олиб ташланадими? Янги қурилаётган ва таъмирланаётган кўчаларга бундай тўсиқларни ўрнатиладими ёки йўқ? Тўсиқларни ўрнатиш ва олиб ташлаш харажатлари ҳақида-ку, Абдулазиз Комилов таъбири билан айтганда, «айтмай қўя қолайлик».
Ахборот олиш машаққати
Ҳолат юзасидан Тошкент шаҳар ҳокимлиги Ахборот хизмати билан боғландик. Ахборот хизматидаги референт қиз: «Мурожаатингиз бўйича расмий ахборотни фақат матбуот котиби бера олади, лекин ҳозир матбуот котиби ўрни бўш, менда эса журналистларга расмий ахборот бериш ваколати йўқ. Шу боис бу саволингизга жавобни бевосита қурилиш комплекси масъулларидан олишингиз мумкин», — деб, комплекс қабулхонаси рақамини берди.Айтилган рақам бўйича ҳеч ким гўшакни кўтармаганидан сўнг, яна Ахборот хизмати билан боғландик. Шундан сўнг у шаҳар ҳокими қабулхонаси билан боғланишни тавсия қилди. Ҳоким қабулхонаси котиби саволимизни эшитиши билан, ҳокимнинг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари қабулхонаси рақамини берди. Ҳоким ўринбосари қабулхонаси тўсиқларни олиб ташлаш билан Ободонлаштириш бошқармаси шуғуллангани, барча саволларни уларга бериш кераклигини айтиб, янги рақамни ўқиб эшиттирди.
Ободонлаштириш бошқармаси қабулхонасидаги котиба тўсиқлар нима сабабдан олиб ташлангани ва яна қайси кўчалардан олиб ташланиши мумкинлиги ҳақидаги савол билан диспетчерлик хизматига мурожаат қилишимиз кераклигини айтди. Диспетчерлик хизматидаги масъул ходим қабулхона ходимлари бизга аслида Ободонлаштириш бошқармасининг Йўл бўлими телефон рақамини бериши лозим бўлганини айтди ва яна янги рақамни маълум қилди. Йўл бўлимида қўнғироғимизга жавоб берган масъуллар эса: «Шанба-якшанба — бизда дам олиш куни. Шанба куни бўлган ишдан сиз орқали хабар топдик, энди сўраб-суриштириб кўрамиз», — деб жавоб берди.
Мазкур «коптокка айланиш» жараёнида шаҳар ҳокимлигидаги суҳбатдошларимиздан бири «кўча ўртасидаги ажратувчи тўсиқларнинг олиб ташланиши шаҳар ҳокимлигининг ташаббуси билан эмас, балки Президент девони томонидан чиқарилган қарор асосида амалга оширилган»ини айтиб ўтди. Яна бир суҳбатдошимиз вазият бўйича шаҳар ИИББ Йўл ҳаракати хавфсизлиги хизмати (ЙҲХБ) билан боғланишни тавсия қилди, бироқ на ИИББ диспетчерлик хизмати томонидан берилган икки рақамга, на очиқ манбаларда кўрсатилган ЙҲХБнинг бешта телефон рақамига қўнғироқ қилиб тушиб бўлди.
Шунча қўнғироқлар давомида саволларимизга тайинли жавоб ололмаган бўлсак-да: «Хат билан мурожаат қилинг!», — деган совуқ гапни бирор марта эшитмаганимизга ҳам хурсанд бўлдик. Очиқ қолаётган саволларнинг жавобини эса мутасадди ташкилотлар «қачон тилга кирсалар, нима бўлганини ўзлари айтиб берадилар», деб умид қилиб қоламиз.
Изоҳ (0)