Ғарбий Австралия қирғоқларида ҳинд афалиналари яшайди. Қишки вақтда уларнинг аксарияти илиқ сувларга сузиб кетади. Ёзда эса популяциянинг сони икки баробар кўпаяди. Кўплаб дельфинлар каталогга киритилган ва ўз лақабига эга. Олимлар уларни ҳаёти давомида кузатиб боради.
2015 йилда қирғоқда биологларга 2007 йилдан буён маълум бўлган 20 ёшли Жиллиган лақабли дельфин ўлик ҳолда топилган. Саккиз йиллик кузатишлар давомида у 20 мартадан кўпроқ кўзга ташланган. National Geographic дельфиннинг ўлими сабабларини баён қилди.
Ўлган дельфиннинг оғзидан саккизоёқнинг пайпаслагичлари чиқиб турган. Олимлар дельфин ўз ўлжасининг қурбонига айланган, деб тахмин қилган. Австралиянинг Мердок университети олимлари ҳодисани батафсил ўрганиб чиқди.
Аниқланишича, Жиллиган маори саккизоёғини тутиб олган. Бу Австралия ва Янги Зеландия акваториясида яшовчи энг йирик ва тажовузкор саккизоёқ ҳисобланади. Дельфиннинг оғзига тушган икки килограммли моллюска ҳаёт учун курашни давом эттирган. Унинг пайпаслагичлари дельфин тилининг шиллиқ қисми, танглайи, қизилўнгачи ва томоғининг ён деворларига жиддий жароҳат етказган.
Биологларнинг фикрига кўра, дельфин ёки кислород етишмаслиги ёки қонга катеходаминнинг сўрилиши оқибатида юз берган инфаркт сабабли ўлган. Катеходаминнинг қонга сўрилиши стрессли вазиятларда юз беради.
Ўзининг озуқабоплиги сабабли саккизоёқлар тез-тез дельфинлар ўлжасига айланади. Уларни ов қилиш тактикаси бор: улар молюскаларни қаттиқ силкитиб, пайпаслагичларини ишлатишга имкон бермайди. Бу ҳолатда моллюска қаршилик қилишдан чарчайди ва дельфин уни еб қўяди. Жиллиган эса қоидага кўра ҳужум қилмаган. Унинг ўлимига яна бир сабаб унинг очкўзлиги бўлган. Дельфиннинг ошқозонида анчагина балиқ ва моллюска топилган, шунинг учун у яна битта саккизоёқни овлаши керак бўлмаган.
Изоҳ (0)