Наманганда ичимлик суви таъминотини яхшилашга салкам 28 млрд сўм йўналтирилади
Кейинги икки йилда Наманган вилоятида умумий қиймати 32,7 миллиард сўмга тенг 2 та янги сув тарқатиш иншооти қурилиб, 2 таси реконструкция қилинди. Натижада 419 минг аҳолининг ичимлик сув таъминоти яхшиланди. Бу ҳақда «Дарё» мухбири хабар бермоқда.
Жорий йилда эса аҳолини ичимлик суви таъминотини яхшилаш бўйича 2017 йил дастурига асосан янги тармоқ ва иншоотлар қуриш ҳамда реконструкция қилиш ишларига 27, 8 миллиард сўм ажратилган.
— Ўзбекистон Президентининг «2017-2021 йилларда ичимлик суви таъминоти ва канализация тизимларини комплекс ривожлантириш ҳамда модернизация қилиш дастури тўғрисида»ги қарорига асосан «Наманган шаҳрининг ичимлик ва оқава сув тизимларини реконструкция қилиш» лойиҳасига жами 160 миллион, хусусан, Европа тикланиш ва тараққиёт банкининг 140 миллион доллар миқдоридаги маблағини жалб этиш кўзда тутилган, — дейди вилоят «Сувоқава» давлат унитар корхонаси директори Муҳамадаюбхўжа Апақов. — Агар амалга ошириладиган ишларга тўхталадиган бўлсак, Наманган шаҳрини ичимлик суви билан таъминловчи 3 та сув олиш ва 10 сув узатиш иншооти тўлиқ реконструкция ва модернизация қилинади.
37 километр узунликдаги «Учқўрғон—Наманган» магистрал тармоғининг 2-навбати қурилади. 65,2 километр магистрал ва кўча тармоқлари реконструкция қилинади. Шунингдек, Наманган шаҳар оқава сувларни тозалаш иншоотининг қуввати реконструкция ҳисобига суткасига 90 мингдан 150 минг куб метрга етказилади. 19 километр узунликда Жанубий коллектор ҳамда 5 километр узунликда «Уйчи—Наманган» коллекторининг қурилиши якунланмай қолган қисмини қуриш ишлари бажарилади.
«Ровот» сув олиш иншооти ва «Ровот-Тўрақўрғон» магистрал тармоғида 2017-2018 йилларда 1 ва 2-босқичда 24 километр магистрал тармоқни алмаштириш, шунингдек, «Ровот» сув олиш иншоотини тўлиқ қайта реконструкция қилиш ишлари олиб борилади. Умумий қиймати қарийиб 27 миллиард сўмдан иборат мазкур лойиҳа доирасида 10,2 километр узунликда заҳира электр тармоғи тортилади, 17 та тик қудуқ реконструкция қилинади ва замонавий насос билан жиҳозланади. Бундан ташқари, 3 та нимстания ўрнатилади. Лойиҳа амалга оширилиши ҳисобига 156,5 минг киши тоза ичимлик суви билан таъминланади. Бир кишининг кунлик истеъмоли 50 литрдан 110—150 литрга етади.
Вилоятда қатор халқаро молия институтлари иштирокида ҳам истиқболли дастурлар амалга оширилмоқда. Хусусан, қиймати 49,6 миллион доллар бўлган «‘Заркент’, ‘Ҳадикент’, ‘Исковот’, ‘Булоқбоши’, ‘Бўстон’, ‘Ёшлик’ қишлоқлари ичимлик сув таъминотини яхшилаш» лойиҳасига 2017-2020 йилларда ОПЕК ривожлантириш фондининг имтиёзли кредитларини жалб этиш белгиланган. Қиймати 80 миллион долларни ташкил этувчи «Чуст, Поп, Чортоқ, Наманган ва Учқўрғон туманлари ичимлик сув таъминотини яхшилаш» лойиҳаси 2017—2020 йилларда Абу-Даби ривожлантириш фонди иштирокида амалга ошириладиган лойиҳалар таркибига киритилди.
