«Давлат ҳокимияти ва бошқаруви органлари фаолиятининг очиқлиги тўғрисида»ги Ўзбекистон Республикаси Қонуни ижросига асосан 2017 йил 22 май куни Тошкент шаҳар ҳокимлигида ижтимоий-маънавий муҳитни соғломлаштириш, ёшлар ва хотин-қизларнинг ҳуқуқ ва манфаатларини ҳимоя қилиш, уларни қўллаб-қувватлаш йўлида олиб борилаётган ишлар, хусусан, Тошкент шаҳрининг Шайхонтоҳур, Олмазор ва Учтепа туманларида ташкил этилган Аёллар маслаҳат марказлари фаолиятига доир матбуот анжумани ўтказилди.
Анжуманда учала туман маслаҳат марказлари раҳбарлари, ОАВ ходимлари, Тошкент шаҳар ҳокимияти вакиллари иштирок этди.
Тошкент шаҳар ҳокимлиги «Маҳалла» хайрия жамоат фонди билан ҳамкорликда 2014 йилда Шайхонтоҳур туманида, 2015 йилда Олмазор ва Учтепа туманларида Аёллар маслаҳат марказлари ташкил этилган эди.
2015—2016 йилларда марказларга 15724 нафар хотин-қизлар ташриф буюриб, уларнинг 6356 нафари турли муаммоли масала бўйича мурожаат этган. 5693 нафар шахсга услубий, ҳуқуқий ва психологик ёрдам кўрсатилиб, 2368 нафар фуқаронинг муаммоли масаласи ижобий ҳал этилган.
Марказ ходимлари 35 та суиқасд ҳолатларини олдини олишга, 388 нафар аёлларнинг маънавий дунёқарашларини соғломлаштиришга эришилган.
2017 йилнинг 4 ойи давомида марказларга 4081 нафар фуқаро мурожаат этиб, 1777 нафар шахснинг муаммосини ҳал этишда кўмак берилган.
Сўнгги вақтларда аёлларда нафақат ҳуқуқий ва тиббий йўналишда, балки диний-шаърий масалаларда ҳам саволлар кўпайганлигини инобатга олиб, Марказлар Ўзбекистон мусулмонлар идораси ва Тошкент ислом университети билан ҳамкорликда дин соҳаси мутахассисларини марказга жалб қилган ҳолда, виждон эркинлиги ва диний мавзуларда очиқ мулоқотлар ва давра суҳбатларини ташкил этиб, аҳолининг ушбу йўналишдаги эҳтиёжлари қондирилмоқда.
Изоҳ (0)