“Davlat hokimiyati va boshqaruvi organlari faoliyatining ochiqligi to‘g‘risida”gi O‘zbekiston Respublikasi Qonuni ijrosiga asosan 2017-yil 22-may kuni Toshkent shahar hokimligida ijtimoiy-ma’naviy muhitni sog‘lomlashtirish, yoshlar va xotin-qizlarning huquq va manfaatlarini himoya qilish, ularni qo‘llab-quvvatlash yo‘lida olib borilayotgan ishlar, xususan, Toshkent shahrining Shayxontohur, Olmazor va Uchtepa tumanlarida tashkil etilgan Ayollar maslahat markazlari faoliyatiga doir matbuot anjumani o‘tkazildi.
Anjumanda uchala tuman maslahat markazlari rahbarlari, OAV xodimlari, Toshkent shahar hokimiyati vakillari ishtirok etdi.
Toshkent shahar hokimligi “Mahalla” xayriya jamoat fondi bilan hamkorlikda 2014-yilda Shayxontohur tumanida, 2015-yilda Olmazor va Uchtepa tumanlarida Ayollar maslahat markazlari tashkil etilgan edi.
2015—2016-yillarda markazlarga 15724 nafar xotin-qizlar tashrif buyurib, ularning 6356 nafari turli muammoli masala bo‘yicha murojaat etgan. 5693 nafar shaxsga uslubiy, huquqiy va psixologik yordam ko‘rsatilib, 2368 nafar fuqaroning muammoli masalasi ijobiy hal etilgan.
Markaz xodimlari 35 ta suiqasd holatlarini oldini olishga, 388 nafar ayollarning ma’naviy dunyoqarashlarini sog‘lomlashtirishga erishilgan.
2017-yilning 4 oyi davomida markazlarga 4081 nafar fuqaro murojaat etib, 1777 nafar shaxsning muammosini hal etishda ko‘mak berilgan.
So‘nggi vaqtlarda ayollarda nafaqat huquqiy va tibbiy yo‘nalishda, balki diniy-sha’riy masalalarda ham savollar ko‘payganligini inobatga olib, Markazlar O‘zbekiston musulmonlar idorasi va Toshkent islom universiteti bilan hamkorlikda din sohasi mutaxassislarini markazga jalb qilgan holda, vijdon erkinligi va diniy mavzularda ochiq muloqotlar va davra suhbatlarini tashkil etib, aholining ushbu yo‘nalishdagi ehtiyojlari qondirilmoqda.
Izoh (0)