Эроннинг амалдаги президенти Ҳасан Руҳоний президентлик сайловида ғалаба қозонди ва мамлакат раҳбари лавозимига қайта сайланди. Бу ҳақда Associated Press’га асосланиб «Интерфакс» хабар бермоқда.
Эрон ИИВ хабарига кўра, Руҳонийни сайловчиларнинг 59 фоизи – 22 миллион 800 минг киши қўллаб-қувватлади. Унинг энг яқин таъқибчиси Иброҳим Раисийга сайловчиларнинг 39 фоизи, яъни, 15 миллион 452 минг киши овоз берди.
Кеча, 19 май куни бўлиб ўтган сайловда жами 40 миллион эронлик иштирок этди. Бу сайлашга ҳуқуқи бўлганларнинг 70 фоизи демакдир. Биринчи турда ғалаба қозониш учун номзод 50 фоиздан кўпроқ овоз тўплаши керак эди.
Ҳасан Руҳоний 2013 йилги сайловда 51 фоиз овоз тўплаб ғолиб бўлганди. Ўшанда сайловчиларнинг 73 фоизи президент сайловида иштирок этганди.
Хабарда қайд этилишича, овоз бериш истагида бўлганлар кўп бўлгани сабабли сайлов участкалари иш вақтини бир неча бор узайтиришга мажбур бўлди.
68 ёшли Эрон президенти либерал ислоҳотлар тарафдори бўлиб, сиёсий эркинлик ваъда қилмоқда. Бундан ташқари, Ҳасан Руҳоний бошқа мамлакатлар билан алоқаларни яхшиламоқчи.
Изоҳ (0)