17 май, чоршанба куни Алишер Навоий номидаги Ўзбекистон Миллий кутубхонасида Ўзбекистон халқ шоираси Ҳалима Худойбердиеванинг таваллудини 70 йиллиги муносабати билан тадбир бўлиб ўтди. Тадбирда шоирага «Эл-юрт ҳурмати» ордени топширилди. Мукофотни Президент Шавкат Мирзиёев номидан унинг маслаҳатчиси Хайриддин Султонов топширди ва президент табригини ўқиб эшиттирди.
Шунингдек, тадбирда кўплаб ёзувчилар, шоирлар, адабиётшунослар, халқ артистлари, давлат арбоблари иштирок этди. Жумладан Эшқобил Шукур, Қозоқбой Йўлдошев, Ҳаётхон Ортиқовалар сўзга чиқди. Даврани Ўзбекистон Ёзувчилар уюшмаси раиси Муҳаммад Али олиб борди.
Ҳалима Худойбердиеванинг мухлисларидан бири Ҳаёт Шодмон шоирага атаб чиқарган «Энадарё» китобини совға қилди. Маросим сўнгида шоиранинг ўзи сўзга чиқиб, Президент Шавкат Мирзиёевга, тадбир ташкилотчилари ва иштирокчиларига миннатдорчилик билдирди.
Маълумот ўрнида, шоира Ҳалима Худойбердиева 1947 йил 17 майда Сирдарё вилояти Боёвут туманидаги «Тараққиёт» жамоа хўжалигида туғилган. 1972 йилда ҳозирги Ўзбекистон Миллий университетини тамомлаб, меҳнат фаолиятини «Саодат» журналида бошлаган. Унинг «Илк муҳаббат», «Оқ олмалар», «Чаман», «Суянч тоғларим», «Бобо қуёш» каби шеърий тўпламлари шеърият ихлосмандларининг севимли китобига айланиб улгурган.
Ҳалима Худойбердиева 1992 йилда «Ўзбекистон халқ шоири» (1992 йил) унвони билан тақдирланган.
Изоҳ (0)