Мирзо Улуғбек номидаги Ўзбекистон Миллий университети ташкил этилган кунга бағишланган маданий-маърифий тадбир бўлиб ўтди. Бу ҳақда ЎзА хабар бермоқда.
1918 йил 12 майда ташкил этилган мазкур олий таълим муассасасида ҳозирда 37 йўналишда бакалавр ва 63 йўналишда магистрлар тайёрланмоқда. Университет ҳузуридаги педагог кадрларни қайта тайёрлаш ва уларнинг малакасини ошириш минтақавий маркази, қатор кафедралар қошида инновацион ҳамкорлик марказлари, ўқув-илмий комплекслар, 3 академик лицей фаолияти йил сайин такомиллашиб бормоқда.
«Университет давлат таълим стандартларини, малака талаблари асосида ўқув режалари ва дастурларини яратиш ҳамда мамлакатимиздаги қатор университетларга татбиқ қилишда таянч таълим муассасаси ҳисобланади. Айни пайтда бу даргоҳда талабаларга таълим-тарбия бераётган профессор-ўқитувчиларнинг 8 нафари академик, 150 дан зиёди фан доктори ва профессор, 400 га яқини фан номзоди ва доцент илмий даражасига эга», — дейилади ЎзА хабарида.
Тадбирда мазкур университет дунёнинг 35 давлатидаги 80 хорижий олий таълим муассасаси ва илмий фондлари билан ҳамкорлик қилиб келаётгани қайд этилди. 2016—2017 ўқув йилида 8 меморандум имзоланди.
Тадбирда университетнинг бир гуруҳ иқтидорли талабалари диплом ва эсдалик совғалари билан тақдирланди.
Изоҳ (0)