Ўзбекистон Республикаси Меҳнат вазирлигида Япония делегацияси билан учрашув бўлиб ўтди. Бу ҳақда вазирлик матбуот хизмати маълум қилди.
Учрашувда томонлар Япониянинг ижтимоий таъминот бўйича йирик компанияларига Ўзбекистон фуқароларини танлаб олиш ва жалб қилиш, Фарғона вилоятида Японияда меҳнат фаолиятини олиб бориш учун кадрлар тайёрлаш марказини очиш, Ташқи меҳнат миграцияси масалалари агентлиги ва Япония компаниялари ўртасида Ўзбекистон фуқароларини Японияда меҳнат фаолиятини амалга ошириш учун жалб қилиш бўйича меморандум имзолаш масалалари муҳокама қилинди.
Музокара давомида Меҳнат вазири Азиз Абдуҳакимов Ўзбекистон ва Япония ўртасида ҳамкорликни янада чуқурлашишига хизмат қилувчи ишончли, очиқ ва ўзаро ҳурматга асосланган муносабатлар ўрнатилганлигини қайд этди. Ўзбек томони Япония меҳнат бозорига малакали мутахассисларни таъминлашиб бериши, бунда Германия ва Туркия иқтисодиётини сезиларли даражада ривожланишига хизмат қилган тажрибадан келиб чиқиш мумкинлигини билдирди.
Ўз навбатида, Япония томони мамлакат меҳнат бозоридаги мавжуд эҳтиёж билан таништирди. Бугунги кунда Япония меҳнат бозорида тиббиёт ходимларига эҳтиёж катта бўлиб, 2017 йил ноябрь ойигача ижтимоий таъминот муассасаларига 35 нафар ва 1 йил муддатда 1000 нафар Ўзбекистон фуқаросини иш билан таъминлаш учун жалб қилишга тайёр эканлиги маълум қилинди.
Япония томонининг кадрларга бўлган эҳтиёж даражаси – япон тили бўйича 4-даражадаги билимга эга ўрта ва кичик тиббиёт ходимлари. Меҳнат вазири Ташқи миграция масалалари агентлигига қисқа муддатда Японияда меҳнат фаолиятини олиб бориш учун номзодларни танлаб олиш ишларини бошлаш бўйича топшириқ берди.
Номзодларни танлаб олиш Япониянинг «Чет эл фуқаролари учун техник малака ошириш дастурини тегишлича амалга ошириш тўғрисида ва чет эл техник малака оширувчиларни ҳимоя қилишни таъминлаш тўғрисидаги Қонуни»га мувофиқ Ташқи миграция масалалари агентлиги томонидан амалга оширилади. Танловдан ўтган фуқаролар агентлик ҳузуридаги Японияга кетаётган фуқароларни жўнаб кетишдан олдинги мослаштириш ва ўқитиш марказида ўқитилиб, жорий йил ноябрь ойида Японияда меҳнат фаолиятини бошлайди.
Япония делегацияси ташриф дастури доирасида Тошкент шаҳридаги бир қатор коллежлар ва «Саховат» қариялар уйига ташриф буюради.
Изоҳ (0)