Тирбандлик туфайли аэропортга кечиккан Бирлашган Араб Амирликлари фуқароси полициянинг унга берган ёрдами ҳақида сўзлаб берди, деб ёзади UAE Inside.
Абу-Дабидаги Ал-Айн амирлигида яшовчи Санил Мэтью Ҳиндистоннинг Керала штатидаги она шаҳрига учиш учун Шаржа аэропортга шошади, аммо тирбандликда қолиб кетади. «Бўлди, кечикдим, улгурмайман», — деб турганида йўлдаги машиналардан бирида фавқулодда ҳолатларда қўнғироқ қилиш мумкин бўлган 999 рақамини кўриб қолади ва уни териб, полицияга ўзи тушиб қолган вазиятни тушунтиради.
15 дақиқадан сўнг Санилнинг ёнига полиция патруль автомобиллари гуруҳи етиб келади, ҳайдовчилик гувоҳномасини текширишгач, унга аэропортга қадар ҳамроҳлик қилиб боришади. Аэропортда эса уни бошқа бир полициячи кутиб олади, рўйхатга олиш ярим соат аввал якунланган бўлишига қарамай, полиция сўрови билан ходимлар кечиккан йўловчини рўйхатга олади ва иммиграция хизматидан ҳам ўтказади.
«Текширув тугагач, полициячи қўлимни сиқиб қўйди ва менга оқ йўл тилади», — деди Санил унинг дунёга назарини ўзгартирган воқеани мамнунлик билан эсга олар экан.
Изоҳ (0)