Microsoft компанияси WannaCrypt товламачи-вирусининг тарқалишини тўхтатиш учун ҳозирда қўллаб-қувватланмаётган операцион тизимлар учун янгиланишлар тайёрлади. Янгиланиш сўнгги уч йилдан бери қўллаб-қувватланмаётган Windows XP тизими учун ҳам чиқарилган, деб ёзади Meduza. Янгиланишларни бу ердан юклаб олиш мумкин.
Microsoft сайтида қолдирилган хабарда эски операцион тизимлар учун янгиланишларнинг чиқарилиши «жуда ноодатий» қадам деб таърифланган. Ҳақиқатан ҳам, Windows XP 2014 йил апрелидан бери қўллаб-қувватланмайди. Шундан бери Microsoft бу тизим учун фақат бир марта — 2014 йил май ойида Internet Explorer браузерида жиддий носозлик аниқланганидан сўнг янгиланиш чиқарган.
Операцион тизимнинг нисбатан янги версияларида WannaCrypt вируси учун қўл келган носозлик бироз аввалроқ — 2017 йил март ойида бартараф этилган эди. Агар фойдаланувчининг компьютерига Windows Vista, 7, 8.1 ёки 10 ўрнатилган ва автоматик янгиланиш тартиби ёқилган бўлса, вирус бу компьютерга хавф солмайди.
Мавзуга доир: Товламачи-вируснинг тарқалиши маънисиз домен номи рўйхатдан ўтказилгани шарофати билан тасодифан тўхтатилди
Windows XP — жаҳондаги энг оммабоп операцион тизимлардан биридир. Жумладан, кўплаб банкоматлар ва бошқа қурилмалар айнан шу операцион тизимда ишлайди.
Изоҳ (0)