Fitch: Ўзбекистон банкларининг кўпчилиги сўм курси пасайишига бардошли

Ўзбекистоннинг Fitch Ratings томонидан рейтингланадиган банкларининг кўпчилиги ҳукумат валюта бозорини эркинлаштиришни ва айирбошлаш операциялари назоратини юмшатишни режалаштираётгани учун ўрта муддатли истиқболда кузатилиши мумкин бўлган сўм курсининг пасайишига бардошли. Шу билан бир вақтда бир қатор банклар миллий валюта курсининг сезиларли тарзда пасайишига таъсирчан ҳисобланади. Бу ҳақда агентликнинг янги ҳисоботида айтилади, деб ёзади «Газета.uz».

Fitch фикрича, «Ўзсаноатқурилишбанк», «Микрокредитбанк», «Трастбанк» ва «Универсал Банк» капиталга нисбатан регулятив талабларни бузмаган ҳолда, курснинг 50 фоиз пасайишига бардош бера олади, «Асака» ва «Ипак йўли» банклари эса курснинг 20 фоизга тушишига чидаб бериши мумкин, аммо уларга қўшимча капитал ёки талаблардан четлашиш учун рухсат керак бўлиши мумкин. «Агробанк» ҳозирданоқ минимал талабларга риоя қилмаяпти.

Сўм девальвацияси «Ўзсаноатқурилишбанк» ва «Асака» банкида юқори даражада бўлган ва «Ипак йўли» банкида аҳамиятли даражада бўлган валюта кредитлари сифатининг ёмонлашишига олиб келиши мумкин.

Fitch ҳисоб-китобларига кўра, давлатнинг чет эл валютасида кўмак бериш қобилияти яхши ҳисобланади, бу ҳақда Ўзбекистоннинг тахминан 25 миллиард доллар (2016 йил охири ҳолатига кўра) даражасидаги йирик валюта захиралари дарак беради, бу банк секторининг икки ҳисса валюта мажбуриятларига ёки унинг ташқи қарзининг 11 карра қийматига тенг.