Пхеньянда жамоат транспорти қандай ишлайди?
«Вести.ru» нашрининг КХДРдаги махсус мухбири Пхеньяндаги жамоат транспорти ҳақида мақола тайёрлади.
Унда айтилишича, шаҳарнинг кенг кўчаларида шахсий автомобиллар жуда кам бўлиб, ҳеч қачон тирбандликлар кузатилмайди. Метро эса нафақат ҳаракатланиш воситаси, балки давлат қудратининг намойиши ҳамдир. Вагонларга Ким Ир Сен ва Ким Чен Иннинг портретлари илинган. Платформаларда барча газеталарнинг бугунги сонлари туради.
Пхеньян метросида адашиб қолиш — деярли имконсиз нарса. Иккита тармоқ, бошқа тармоққа ўтиш учун битта бекат, хариталар, табло ва навбатчилар — ҳар қадамда. Таблода зарур бекатни танлаб, боссангиз, у ерга етиб бориш йўналиши ёнади.
Йўлкира автобусда ҳам, метрода ҳам бир хил — 5 вон (тахминан 0,4 цент). Чипта харид қилиш ҳаттоки маҳаллий аҳоли учун ҳам шунчаки расмиятчилик дейиш мумкин. Бутун шаҳар транспорти давлат бюджетидан молиялаштирилади.
Пхеньянда маҳаллий мезонларга кўра қиммат ҳисобланадиган транспорт — такси. Бир литр бензин КХДРда бир доллар туришини ҳисобга олганда, бу — ҳашамат. Автомобиллар янги, асосан Хитой ва Японияники. Аммо рулда машина маркаси ўрнига ҳайдовчи ҳақидаги маълумот туширилган қоғозни кўриш мумкин.
Кўчаларда элита маркадаги автомобиллар ҳам учрайди. Mercedes, Lexus ва BMW’ларни оқшом пайтлари концертлар ўтказиладиган маданият уйлари ёнида, кундузлари эса расмий тадбирлар жойлари яқинида кўриш мумкин.
Пхеньянда велосипедларни ҳамма жойда учратиш мумкин. Велойўлкалар ва велосипедлар учун тураргоҳлар шаҳарда кўп. Бу, кореяликлар айтишича, ҳам иқтисодиёт, ҳам экология ва ҳам халқ саломатлиги учун фойдали.
