Непал расмийлари Эверест чўққисини забт этиш учун рухсат бериш борасида ёшнинг юқори даражасини белгилаш ниятида. Бу ҳақда мамлакат туризм департаменти раҳбари Динеш Бхаттарай маълум қилди, дея хабар беради «ТАСС».
«86 ёшида Ердаги энг юксак чўққини забт этишга уринган непаллик машҳур альпинист Мин Баҳодир Шерхоннинг фожиали ҳалокатидан сўнг ҳукумат юқори ёш даражасини белгилаш масаласини жиддий муҳокама қилмоқда. Қуйи ёш даражаси аллақачон белгиланган, 16 ёшгача бўлган болаларга рухсат берилмаяпти. Альпинизмга қизиқиш кучайиб бораётгани ва кекса ёшдаги шахслар ўрнатаётган рекордлардан келиб чиқиб, уларнинг хавфсизлигини ўйлаган ҳолда шундай чоралар кўришга мажбурмиз. Юксак тоғлик, кислород даражаси паст бўлган шароитда чўққига кўтарилиш кекса кишилар уддалай олмайдиган вазифага айланади», — дея таъкидлади Динеш Бхаттарай.
Экспертларга кўра, чеклов баландлиги 8 минг метрдан баланд барча чўққиларга тааллуқли бўлиши мумкин. Мамлакат ҳудудида бундай чўққилардан 8 таси жойлашган. Ҳукумат эса уларга кўтариладиган альпинистлар 76 ёшдан ошмаган бўлишини таъминлаши лозим.
Маълумот учун, Эверестни забт этишга чоғланган 86 ёшли Мин Баҳодир Шерхон 6 май, шанба куни 5 минг метрдан юқорида жойлашган лагерда юрак хуружидан оламдан ўтди.
Изоҳ (0)