Норматив-ҳуқуқий ҳужжатлар порталида Автомобилларда ташувлар хавфсизлигини таъминлашни ташкил этиш ва назорат қилиш тартиби тўғрисидаги низом лойиҳаси муҳокама қилинмоқда. Бу ҳақда Norma хабар берди.
Ўзбекистон автомобиль ва дарё транспорти агентлиги автомобилларда ташувлар хавфсизлигини таъминлаш устидан назоратни амалга оширади. Йирик йўловчи ва юкларни ташкил қилувчи масканлар (темир йўл вокзаллари ва бекатлари, дарё портлари, бозорлар, метрополитеннинг охирги бекатлари, охирги ва оралиқ бекатлар ва ҳоказо) унинг объектлари бўлади.
Бунинг учун белгиланган жойларда «автотранспорт назорати» ёзуви туширилган, агентлик логотипига эга, қизил-кўк рангдаги чироқ-маёқчаси ва товушкарнай қурилмаси бўлган махсус автотранспорт пайдо бўлади.
Назоратнинг ўзи транспорт воситасини тўхтатиш ва ҳужжатларни: ҳайдовчилик гувоҳномаси (ҳайдовчи шахсини тасдиқловчи бошқа ҳужжат), йўл варақаси, лицензия карточкаси, техпаспорт, илова қилинадиган ва рухсат берувчи ҳужжатлар ҳамда бошқаларни талаб қилиб олиш йўли билан амалга оширилади.
Агар текшириш натижасига кўра бирор-бир қоидабузилиш аниқланмаса, назорат қилувчи шахс йўл варақасига назоратдан ўтилганлиги тўғрисида штамп босади, у кейинчалик такрорий текширишсиз ҳаракатланишга асос бўлиб хизмат қилади.
Қоидабузилиш аниқланган тақдирда икки нусхада баённома расмийлаштирилади, улардан бири ҳайдовчига берилади, иккинчиси эса айбдорга тегишли чора кўриш учун идоравий мансублиги бўйича тақдим этилади.
Назорат қилувчи шахснинг транспорт воситасини тўхтатиш тўғрисидаги қонуний талаби бажарилмаган тақдирда баённома тузилади, сўнгра у далилий материаллар (фото, видеоқайд, холис гувоҳлар далолатномаси) билан судга узатилади.
Ишлаб чиқилган низом қуйидаги ҳолатларда ишлатилаётган автотранспорт воситаларига нисбатан татбиқ этилмайди:
Табиий офат ва унинг оқибатларини тугатишда ёки қутқарув операцияларида;
Ўрганиш учун бошқариш пайтида;
Шахсий мақсадларда йўловчиларни ва юкларни нотижорий ташишда;
Қуролли кучлар, фуқаро мудофааси бўлинмалари, ёнғин ўчириш ва жамоат тартибини сақлаш кучлари билан;
Фойдаланишга топширилмаган янги ёки реконструкция қилинаётган транспорт воситасини пухта ишлаш, таъмирлаш ёки техник хизмат кўрсатиш доирасида йўл синовларини ўтказишда.
Изоҳ (0)