Facebook асосчиси Марк Цукерберг ижтимоий тармоқ қоидаларини бузувчи контентга қарши кураш режалари билан ўртоқлашди. Компания бутун дунё бўйлаб қўшимча равишда 3 минг кишини ёллаб, уларнинг ёрдамида фойдаланувчилардан келиб тушаётган шикоятларни тезкор кузатиб боради, деб хабар беради «РБК».
Ҳозир бунинг устида 4,5 минг киши ишламоқда. Штатни кенгайтириш йил давомида амалга оширилиши режалаштирилган.
Бундан ташқари, ижтимоий тармоқ постинглар устидан шикоят қилиш механизмини соддалаштиради.
Шу йўл билан Марк Цукерберг Facebook орқали қотилликлар ва худкушликлар видеолари трансляция қилиниши билан боғлиқ воқеаларга қарши чора кўрилишини билдирди. Апрель ойининг ўрталарида фойдаланувчи Стив Стивенс ўз саҳифасида Огайо штатининг Кливленд шаҳрида кекса ўткинчининг ўлдирилиши акс этган видеолавҳа жойлаштирган эди. Кейинчалик қотил ўзини ҳам ўлдирди. Кўпчилик ушбу видео бир неча соат давомида тармоқда қолгани учун Facebook’ни танқид остига олган эди.
Изоҳ (0)