SpaceX ходими ўзининг Instagram’даги саҳифасига Tesla асосчиси ва раҳбари Илон Маск томонидан Лос-Анжелесда туннель қурилиши учун ишлатиладиган бурғулаш машинасининг биринчи суратини жойлаштирди. Бу ҳақда TJournal хабар берди.
Сурат муаллифи сурат остига «бурғулашнинг яна бир (зерикарли) куни», деб изоҳ қолдирган. фотосуратга бошқа ҳеч қандай тушунтириш берилмаган.
Қурилмага The Boring Company (Бурғулаш компанияси, инглиз тилида «Зерикарли компания»га оҳангдош) компаниясининг рамзи туширилган. Компания Илон Маскга тегишли бўлиб, транспорт туннелларини қуриш билан шуғулланади.
SpaceX ходими томонидан жойланган суратга ОАВлар эътибор қаратди. Сурат катта акс садо бера бошлагач, ходим суратни ўчириб, аккаунтини ёпиқ қилиб қўйди. Унинг нима учун бундай қилганлиги номаълум.
Февраль ойида Маск Bloomberg нашрига бурғулаш машинаси тайёр бўлгани ва фойдаланилаётганини маълум қилган. Унинг вазни 1,2 минг тонна, диаметри 7,9 метр, узунлиги 121,9 метрни ташкил қилади. SpaceX асосчиси машинани Нанни деб номлаган.
Суратдаги ҳақиқатдан ҳам Нанними ёки йўқлиги номаълум. SpaceX вакили бу ҳақдаги сўровга жавоб бермаган. Суратдаги қурилма машинанинг бир қисми деб тахмин қилинмоқда. SpaceX олдидаги майдондан Лос-Анжелес аэропортигача туннель қазиш фикри Маскда 2016 йил декабрида туғилган. Бу вақтда у тирбандликда қолиб кетган ва келажакда уни четлаб ўтиш учун лойиҳани ўйлаб топган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)