Американинг оммабоп «Тахтлар ўйини» (Game of Thrones) сериалида бош ролларни ижро этувчи актёрлар телевидение тарихида энг кўп маош олган актёрларга айланади. Бу ҳақда Британиянинг Daily Express газетасига таяниб, «ТАСС» хабар берди.
Янги шартномалар шартларига кўра, Эмилия Кларк (Дейнерис Таргериен ролини ижро этади), Кит Харингтон (Жон Сноу), Николай Костер-Валдау (Жейме Ланнистер), Питер Динклейж (Тирион Ланнистер) ва Лена Хиди (Серсея Ланнистер) сериалнинг еттинчи ва саккизинчи фаслларида ҳар битта қисм учун икки миллион фунт (2,56 миллион доллар)дан гонорар олади. Келишув, шунингдек, сериални бошқа мамлакатларда намойиш этиш ҳуқуқи сотилса, қўшимча мукофот пули берилишини кўзда тутади.
«Тахтлар ўйини» сериалининг янги фасли премьераси 2017 йил 17 июлга белгиланган, у дунёнинг 170 дан ортиқ мамлакатларида трансляция қилинади.
Изоҳ (0)