Президент девони хизмати Шайхонтоҳур туманида аҳоли учун сайёр қабул ўтказди

Ўзбекистон Республикаси Президенти девонининг Жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати, Президентнинг Тошкент шаҳри ва Шайхонтоҳур туманидаги Халқ қабулхоналари томонидан пойтахт аҳолиси учун навбатдаги сайёр қабул ташкил этилди. Бу ҳақда Facebook’даги «Халқ билан мулоқот» гуруҳи саҳифасида маълум қилинди.

Сайёр қабулда Ўзбекистон Республикаси Олий суди, Олий хўжалик суди, Марказий банк, Бош прокуратура, Ички ишлар, Фавқулодда вазиятлар, Олий ва ўрта махсус таълим, Халқ таълими, Соғлиқни сақлаш, Мудофаа, Молия, Меҳнат, Адлия вазирликлари, давлат қўмиталари раҳбарлари, Тошкент туманлари ҳокимликлари масъул ходимлари, фуқаролар иштирок этди.

Таҳлил натижаларига кўра, бугунги кунгача Шайхонтоҳур туманида истиқомат қилувчи аҳолидан жами 15 978 мурожаат келиб тушган. Уларнинг аксариятини уй-жой олиш ва уй-жой қуриш учун ер ажратиш, уй-жойларнинг таъмирга муҳтожлиги (22,7 фоиз), банк-молия ва солиққа тортиш (9,5 фоиз), моддий ёрдам, иш ҳақи, пенсия таъминоти ҳамда болалар нафақасини олиш (6,6 фоиз), судларда жиноят ишлари, фуқаролик ишлари, хўжалик судларида ишлар кўрилиши (5,6 фоиз), меҳнат ва бандлик (4,4 фоиз), ободонлаштириш ва коммунал хўжалиги, жумладан, йўлларнинг таъмирланиши (3,5 фоиз) масалаларини ташкил этди.

Келиб тушган мурожаатларнинг 6 625 таси Шайхонтоҳур туман ҳокимлигига тегишли. Уларнинг 5 510 таси (83,2 фоизи) кўриб чиқилган бўлиб, 1 115 та (16,8 фоиз) мурожаат кўриб чиқилиш жараёнида. Мурожаатларнинг 4 864 тасига муддати бузилган ҳолда жавоб берилган.

Шайхонтоҳур туман ҳокимлигида мурожаатлар билан ишлаш тизими тўғри ташкил этилмагани, мурожаатларни тақсимлаш ва назорат қилиш ишларига малакали кадрларни жалб этилмагани ҳамда таҳлил ишларининг йўлга қўйилмагани оқибатида жами 447 та муддати ўтган мурожаат мавжуд бўлиб, шундан 178 таси 2016 йилдан ўтган, 269 таси эса жорий йилнинг январь, февраль ва март ойларида келиб тушган.

Очиқ мулоқотда туманларда мурожаатлар билан ишлаш, одамларнинг ичига чуқур кириб бориш, уларни тинглаш, йиғилиб қолган муаммоларни ҳал қилиш борасида йўл қўйилаётган хато ва камчиликлар кескин танқид қилинди.