Наманганда вилоят соғлиқни сақлаш бошқармаси томонидан ўтказилган «Ҳар бир ўқувчи ва талаба эътиборда» акцияси якунига етди. Бу ҳақда «Namnews.uz» хабар бермоқда.
Чуқурлаштирилган тиббий кўрикка вилоятдаги барча академик лицей, касб-ҳунар коллежлари ва олий ўқув юртларида таҳсил олаётган ёшларни жалб этиш кўзда тутилганди. Шунинг учун Наманган шаҳри ва туманлардаги кўп тармоқли марказий поликлиникаларнинг тор соҳа мутахассислари, вилоят ихтисослаштирилган даволаш-профилактика муассасаларининг энг малакали шифокорлари мазкур тиббий тадбирга сафарбар қилинди.
Қарийб икки ойдан ортиқ вақт давом этган акция доирасида 72 мингдан зиёд ўқувчи ва талабанинг саломатлиги энг замонавий тиббиёт асбоб-ускуналари ёрдамида текширилди. Аниқланган касалликларни даволаш юзасидан тегишли тавсия ва маслаҳатлар берилди.
— Дастлабки тиббий-ижтимоий тадбир йигит ва қизларда учрайдиган айрим касалликларни барвақт аниқлаш имконини берди. Тиббий текширувларнинг бевосита ўқув масканларида уюштирилганлиги талаба ва ўқувчиларнинг вақтини тежашга шароит яратди. Келгусида бу жараённи янада такомиллашган ҳолда давом эттириш ниятидамиз, — дейди вилоят соғлиқни сақлаш бошқармаси бош мутахассиси Дилшод Ҳошимов. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)