Футбол бўйича Ўзбекистон Олий лигасининг 7-турида Тошкентнинг «Пахтакор» клуби мағлуб бўлди. Мазкур тур пойтахтнинг бошқа бир клуби «Бунёдкор»нинг ўз майдонида 2 очко йўқотиши билан бошлаганди.
«Пахтакор» ўз майдонида мамлакатнинг амалдаги чемпиони ҳисобланган «Локомотив»ни қабул қилди ва 1:2 ҳисобида имкониятни бой берди.
Беллашувни бошқариб борган Бахтиёр Намозов ҳар икки клуб дарвозаси томон пенальти тайин қилди. Станислав Андреев уни голга айлантира олмаган бўлса, «темирйўлчилар» сафидан Марат Бикмаев мўлжалда адашмади. Кейинроқ Бикмаев дублини расмийлаштириб, «Локо»га ғалаба келтирган голга ҳам муаллифлик қилди.
Бош ҳакам иккинчи бўлимда мезбонларнинг икки футболчисини майдондан четлатди. Аввалига Камолиддин Тожиев иккинчи сариқ карточкани олган бўлса, беллашув якунида Александр Лобанов терма жамоадаги ҳамкасби Игнатий Нестеровга ҳалал бергани учун ечиниш хонасига равона бўлди.
Мазкур ғалаба «Локомотив»ни турнир жадвалида 15 очко билан пешқадамга айлантирди. Мирко Йеличич жамоаси бир тур аввал ҳам марказий ўйинда майдонга тушиб, Қаршининг «Насаф» клубини 2:1 ҳисобида мағлуб этганди.
«Пахтакор» эса 7 та ўйиннинг 5 тасида очко йўқотди. Жамоага янги тайинланган мураббий Равшан Ҳайдаровга сўнгги икки турда максимал очко олиш вазифаси юклатилганди. Унинг жамоаси аввалига «Шўртан»дан, кейин эса «Локомотив»дан енгилди.
Ўзбекистон Олий лигаси 7-тур ўйини 21 апрель, жума
Изоҳ (0)