Ўзбекистон Президенти Шавкат Мирзиёев жорий йил 20—21 январда Қорақалпоғистон Республикасига ташрифи давомида Ибройим Юсупов номидаги иқтидорли болалар мактаби қурилиш участкасига ташриф буюрган эди. «KRuz.uz» нашри мактаб қурилишининг бугунги ҳолати ҳақида хабар берди.
Ташриф чоғида мактаб лойиҳасини такомиллаштириш, хусусан, бино олдида майдон барпо этиш ва бу ерда Ўзбекистон ва Қорақалпоғистон халқ шоири, Ўзбекистон Қаҳрамони Ибройим Юсупов ҳайкалини ўрнатиш, мактаб ёнидан алоҳида бинода замонавий дарсликларни ва бошқа адабиётларни қорақалпоқ тилига таржима қиладиган марказ ташкил этиш ва уни энг замонавий босмахона ускуналари билан таъминлаш бўйича кўрсатмалар берилган.
Мазкур топшириқ юзасидан, Қорақалпоғистон Республикаси Вазирлар Кенгашининг 2017 йил 15 февралдаги «2017—2018-ўқув йилидан бошлаб И.Юсупов номидаги қорақолпоқ тили ва адабиёти фанини чуқур ўргатишга йўналтирилган Республика давлат ихтисослаштирилган умумтаълим мактаб-интернатини янгидан қуриш тўғрисида»ги 68-сонли қарори қабул қилинди.Нукус шаҳри ҳокимининг 2017 йил 28 январдаги қарори асосида мактаб қурилиши учун Нукус шаҳри А.Досназаров кўчасидан 1,1 гектар ер майдони ажратилган.
Шунингдек, 2017 йил 21 январдан бошлаб 216 ўқувчи ўрнига эга мактаб биноси, 100 ўринли ётоқхона, фаоллар зали, ошхона ҳамда мазкур мактаб қошида таржима маркази, кичик босмахонанинг лойиҳа-смета ҳужжатларини тайёрлаш бошланган. Ҳозирги кунда ўқув биносининг пойдеворини тиклаш ишлари якунланиб, ётоқхона биносининг пойдеворини қуриш ишлари олиб борилмоқда.
Халқ таълими вазирлиги томонидан 1 августгача мактабни зарур бўлган ўқув жиҳозлари билан таъминлаш чоралари кўрилмоқда.
2017—2018-ўқув йилидан мактаб фаолиятини йўлга қўйиш ҳамда иқтидорли ўқувчилар қабулини ташкил этиш мақсадида тарғибот ишлари бошланган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)