Малайзия ва Филиппин махсус хизматлари «Абу Сайяф» террористик гуруҳининг икки мамалакат курортларидан, тахминан, 20 нафар хорижликни ўғирлашга қаратилган режасини фош қилди. Бу ҳақда Star газетасига таяниб, «ТАСС» хабар берди.
«Улар ўғирликни нафақат фуқароларни гаров пули эвазига сотиш, балки гаровдагилардан Филиппин жанубида террористик гуруҳга қарши олиб борилаётган ҳарбий ҳаракатларни тўхтатиш борасида музокаралар учун фойдаланиш мақсадида режалаштирган», — деб ёзади Star газетаси.
Хабар қилинишича, экстремистларнинг асосий нишони ташқи кўриниши европаликга ўхшаш сайёҳлар бўлган.
Газета берган маълумотларга кўра, февраль ойида Малайзиянинг шарқий қирғоқларида тезюрар қайиқларда сузиб юрган ҳамда автомат ва гранатамётлар билан қуролланган бир неча ўнлаб жангарилар аниқланган.
Тахмин қилинишича, террористлар Малайзиянинг Сабах штати яқинида жойлашган курорт оролларига сайёҳларни олиб борувчи кемаларга ҳужум қилишни, кейин эса уларни Филиппин жанубидаги базаларига олиб кетишни режалаштирган. Нашр томонидан таъкидланишича, кучайтирилган хавфсизлик чоралари ҳамда апрель ойида Филиппин ҳукумат кучлари ва жангарилар ўртасида бўлиб ўтган йирик тўқнашувда «Абу Сайяф»нинг дала қўмондони Абу Рамининг йўқ қилиниши режанинг барбод бўлишига олиб келган.
Махсус хизматларнинг хабарига кўра, йўқ қилинган жангари хорижликларни ўғирлашда асосий ташкилотчилардан бири бўлган. Бундан ташқари, у бир неча марта хорижликлар қатл қилинган видеоматериалларда кўринган. Айнан у охирги бўлиб қурбонларнинг «ҳукмини ижро этган».
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)