Тошкентнинг «Пахтакор» клуби бош мураббийи Равшан Ҳайдаров «Шўртан»дан қабул қилиб олинган мағлубиятдан кейин футболчиларидаги бефарқликдан нолиди. Бу борада у матбуот анжуманида айтган.
Ҳисоб барчасини айтиб турибди. «Шўртан» биздан кучли ўйин кўрсатиб, ғалабага эришди. Афсуски, бизда жуда кўп муаммолар бор: ички муҳит, жамоа руҳияти ва таркиб. Энг асосийси, футболчиларимизда қандайдир бефарқлик ҳукм сурмоқда. Бу эса мени ўйлантирмоқда.Аввалроқ «Пахтакор» Муборакда «Машъал»дан 0:3 ҳисобида енгилгач, бош мураббий Григорий Колосовский ишдан олинганди. Кўп ўтмай, Равшан Ҳайдаров ҳам шу ҳисобдаги мағлубиятни қабул қилиб олди.
Равшан Ҳайдаров «Пахтакор» тепасига ҳисоб бўйича учинчи бор келганидан кейин клубда катта ўзгаришлар бўлгани тахмин қилинди. Гарчи «Пахтакор» матбуот хизмати бу борада аниқ ахборот бермаган бўлса-да, клубда раҳбарият ўзгариб улгургани айтилмоқда.
Шундан келиб чиқиб, «Пахтакор» стадионининг реконструкция қилиниши мумкинлиги, жамоага Европа ва Бразилиядан янги мутахассис изланаётгани ва легионер футболчи келиши мумкинлиги борасида хабарлар пайдо бўлганди.
Изоҳ (0)