Bloomberg: Twitter’даги Трамп обуначиларининг деярли учдан бири — бўш аккаунтлар

Bloomberg АҚШ президенти Дональд Трампнинг Twitter’даги обуначилари таҳлилига бағишланган кенг кўламли тадқиқот олиб борди. Бу ҳақда TJournal хабар бермоқда. 

Агентлик Трампга обуна бўлган салкам 28 миллион аккаунтдан 7,5 миллиони ёки 28 фоизи ботлар, сохта ва бўш ҳисоблар эканлигини аниқлади. Таҳлиллар, шунингдек, Трамп обуначиларининг 81 фоизи эркаклар эканлигини кўрсатди. 

Bloomberg Twitter’даги президент обуначиларининг 7 та асосий турини ажратиб кўрсатди. Булар лоялистлар, барчага нафрат билан қаровчилар, жамоатчилик фаоллари, ҳазилкашлар, троллар, ботлар ва бўш аккаунтлардир. 

АҚШ президентининг 10 фаол издошидан охирги ой мобайнида бештаси бот эканлиги тасдиқланди, учтаси шундай эканлиги гумон қилинмоқда.

Трампнинг энг сермаҳсул обуначиларидан бири — @Trump2016_Fan 2016 йилда 18 мингдан ортиқ твит йўллади. Улар асосан 45-президентни қўллаб-қувватлашга қаратилган ва Caps Lock’да ёзилган. 

SocialRank агентлиги асосчиларидан бири Александр Таубга кўра, бу натижалардан ажабланмаса ҳам бўлади, чунки Трамп юритаётгани каби оммавий аккаунтлар, қоидага кўра, сохта ва шубҳали обуначиларни жалб этади. Ботлар эса Twitter’даги фаол ҳаётнинг ажралмас қисми ҳисобланади. 

«Дарё»нинг Telegram’даги расмий канали — @toshqindaryo’га аъзо бўлинг!