Венгрия пойтахти Будапештда Жорж Сорос томонидан асос солинган Марказий Европа университетининг ёпилишига қарши намойиш бўлиб ўтди, деб хабар бермоқда Meduza.
Ташкилотчиларнинг ҳисоб-китоби бўйича, сўнгги йиллардаги энг катта дея топилган ушбу намойишда 70 мингга яқин одам қатнашган.
Венгрия парламенти апрель ойи бошида мамлакат ҳудудида фаолият олиб бораётган хорижий олий таълим муассасаларининг ўз мамлакатида ҳам филиали бўлиши лозимлиги ҳақидаги қонунни қабул қилгач, Марказий Европа университети ёпилиш хавфи остида қолган эди.
Сорос асос солган университет АҚШда аккредитациядан ўтган, бироқ фақат Венгрия ҳудудида фаолият кўрсатади.
Венгрия президенти Янош Адер университетлар фаолияти тўғрисидаги қонун лойиҳасини 10 апрель куни имзолаши кутилмоқда, шундан сўнг у кучга киради. Намойиш иштирокчилари эса президентдан ҳужжатни имзолашни эмас, уни қайта кўриб чиқиш учун Конституциявий судга юборишни сўрамоқда.
Марказий Европа университетига 1991 йили Жорж Сорос томонидан асос солинган. ОТМда таълим фақат инглиз тилида олиб борилади. Унда бир вақтнинг ўзида 1,8 мингга яқин талаба таҳсил олади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)