Петербург метросидаги теракт ижрочилари икки киши бўлиши керак бўлган

Петербург метросидаги бомба 3 апрелда икки киши томонидан портлатилиши керак бўлган. Бу ҳақда «Коммерсантъ» нашрига таяниб, «Ведомости» маълум қилди.

6 апрелда ҳуқуқни муҳофаза қилувчи органлар Санкт-Петербург шаҳрининг «Товаришческий» шоҳ кўчасидаги уйда уч кишини қўлга олган. Хонадон бомба тайёрловчи цех ва қурол омбори сифатида фойдаланилган. Хонадондан ўт ўчиргич корпуси остига жойлаштирилган, ишлатиш учун тайёр бўлган қўлбола портловчи қурилма, қуроллар, ҳарбий аслаҳалар ва экстремистик адабиётлар топилган. Топилган қурилма «Плошчад Восстания» бекатида топилган ва зарарсизлантирилган қурилма билан бир хил бўлган. Шу билан бирга, қўлбола портловчи қурилманинг қисмлари теракт ижрочиси Акбаржон Жалилов томонидан ижарага олинган уйда қолдирилган қурилма қолдиқлари билан мос тушди.

Тергов тахминларига кўра, Акбаржон Жалиловнинг шериги қандайдир сабабга кўра белгиланган жойга келмаган, шунинг учун террорчи ортиқча бомбадан «Плошчад Восстания» бекатида халос бўлган. Бомба масофадан эмас, балки қурилмадаги тугма ёрдамида ҳаракатга келтирилганлиги аниқлаштирилмоқда.

Россия Тергов қўмитаси 6 апрелда Петербург метросидаги терактни ташкиллаштиришда иштирок этганликда гумонланиб саккиз киши қўлга олинганлигини хабар берди.

«Дарё»нинг Telegram’даги расмий канали — @toshqindaryo’га аъзо бўлинг!