Россия пойтахти Москва шаҳрида Ражаб ойининг кириб келгани ва шу билан бир қаторда бутун Ислом дунёсига машҳур бўлган ўзбекистонлик шайх Муҳаммад Содиқ Муҳаммад Юсуф раҳимаҳуллоҳ хотираларига бағишланган тадбир бўлиб ўтди. Бу ҳақда «Muslimaat.uz» муслималар саҳифаси хабар берди.
Йиғилиш жорий йилнинг 29 март куни Москванинг МРО «Рисолат» қошидаги «Ихлос» мусулмон ўқитувчилар марказида уюштирилди. Унда Ўзбекистондан келган меҳмонлар, пойтахт меҳмонлари, марказда таълим олувчи талабалар ҳамда уларнинг ота-оналари иштирок этди.
Тадбир чоғида шайх Муҳаммад Содиқ Муҳаммад Юсуф раҳимаҳуллоҳнинг шогирдлари Ризқулбек Каримбеков ҳам сўзга чиқиб, ўқувчиларни илм олишга чорлади, бу йўлда ўзларига муҳтарам Шайх Ҳазратларини ўрнак қилиб олишларини таъкидлади.
Йиғилиш доирасида шайх Муҳаммад Содиқ Муҳаммад Юсуф раҳимаҳуллоҳнинг ҳаётлари ва фаолиятларидан тасвирли ёзувлар қўйилди. Шайх Ҳазратларининг шогирдлари ҳамда мактаб раҳбари у кишини илиқ хотиралар билан ёд этдилар.
Мусулмон ўқитувчилар марказининг талабалари, Шайх Ҳазратларининг ватандошлари ака-ука Хуррамовлар Ҳазрат томонидан таржима қилинган ҳадисларни ўзбек тилида айтиб, Ватан ҳақидаги шеърлар билан йиғилганларни хушнуд этишди.
Изоҳ (0)