Tesla Motors компанияси капитализацияси 3 апрель, душанба куни Ford Motor қийматидан ошиб кетди, деб ёзади «Интерфакс».
Шу тариқа, Американинг электромобиллар ишлаб чиқарувчи компанияси ушбу кўрсаткич бўйича АҚШдаги иккинчи энг йирик автомобиль компаниясига айланди. Илон Маск томонидан 2003 йилда яратилган Tesla акциялари 3 апрель куни 7 фоиздан кўпроққа ўсди, унинг капитализацияси 48,7 миллиард долларга етди.
Компания биринчи чоракликда дунёда электромобиллар савдосини ўтган йилнинг шу даврига нисбатан 69 фоизга кўпайтирди. Январь—мартда компания қарийб 25 мингта автомобилни етказиб берди. Шу билан бир вақтда компания фаолияти умуман олганда зарар келтирадиган бўлиб қолмоқда, у ўтган йили 76 мингта машина ишлаб чиқарган.
Йилига 6,5 миллиондан зиёд автомашина ишлаб чиқарувчи 110 йиллик тарихга эга Ford компаниясининг қиймати 45,5 миллиард долларга тенг. Ford’нинг савдо ҳажми ўтган йилнинг шу даврига нисбатан 7 фоизга камайди.