«Шўртан» мавсумни ғалаба билан бошлаган мураббийни истеъфога чиқарди ва икки футболчини ҳайдади

Ғузорнинг «Шўртан» клуби Олий лига 4-туридан кейиноқ Александр Волков билан хайрлашди. Бу ҳақда клуб матбуот хизмати хабар берди.

Волков бошқарувида «Шўртан» йилни «Нефтчи»ни мағлуб этиш билан бошлаган бўлса, кейин кетма-кет уч ўйинда енгилганди: «Динамо» — 0:3, «Машъал» — 0:2, «Металлург» — 2:4.

«Шўртан» ПФК ўтказилган 4 та учрашувдан сўнгги 3 тасида мағлубиятга учраб, қониқарсиз натижа кўрсатганлиги, қолаверса, бундан олдин огоҳлатирилганлигига қарамасдан ишни тўғри йўлга қўя олмагани учун бош мураббий Александр Волковни истеъфога чиқарди, деб ёзилган клуб матбуот хизматининг хабарида.

Раҳбарият фақатгина шу билан чекланмай, икки нафар футболчи билан шартномаларни бекор қилган. Ўз устида ишламаганлиги ва натижада спорт тайёргарлигини, жисмоний ҳолатини пасайтириб юборганлиги учун футболчилар Руслан Вагапов ҳамда Жаҳонгир Жиямуродов билан тузилган шартнома муддатидан олдин бекор қилинди, дейилган хабарда.

Жамоада шу кунга қадар техник директор сифатида ишлаб келаётган Ихтиёр Каримов «Шўртан»га вақтинчалик бош мураббий бўлди.

Маълумот учун, «Шўртан» 2016 йилнинг апрель ойида ҳам ўз мураббийини ишдан бўшатиб, Зоир Тўрақуловга чиқиш эшикларини кўрсатиб қўйганди. Ўшанда ҳам техник директор Ихтиёр Каримов клубни вақтинчалик қабул қилиб олганди.